قازاقپارات كۇنتىزبەسى: 8- اقپان
اتاۋلى كۇندەر
حالىقارالىق ەپيلەپسياعا قارسى كۇرەس كۇنى
جىل سايىن اقپاننىڭ ەكىنشى دۇيسەنبىسىندە اتاپ وتىلەدى. ول ەڭ العاش 2009-جىلى پولشادا ەپيلەپسيمەن اۋىراتىندار كۇنى رەتىندە تويلاندى، 2015-جىلى ول حالىقارالىق دارەجە الدى.
مەديتسينالىق ۇيىمدار اۋرۋ ءتۇرى تۋرالى حالىقتى حاباردار ەتۋ جانە العاشقى كومەك كورسەتۋگە ۇيرەتۋ ماقساتىندا ءتۇرلى اكسيالار وتكىزەدى.
جاس انتيفاشيست- باتىرلار كۇنى
انتيفاشيستىك كوتەرىلىستەرگە قاتىسىپ، قازا بولعان بالالاردىڭ، اتاپ ايتقاندا، فرانسۋز بالاسى دانيەل فەري مەن يراكتىق وقۋشى فادىل جامالدىڭ قۇرمەتىنە وسىلاي اتالعان. بۇل ەكى بالانىڭ ءومىرى اراعا ءبىر جىل سالىپ ءبىر كۇندە جانە ءبىر ساعاتتا قيىلعان.
فەري 1962-جىلى، ال جامال 1963-جىلى 8 اقپاندا قايتىس بولعان.
ەستە قالار وقيعالار
1924-جىلى «ەڭبەكشىل قازاق» گازەتىنىڭ ءتورتىنشى بەتىندە اپتاسىنا ءبىر رەت شىعاتىن جاستار بەتى اشىلدى. كەيىننەن «لەنينشىل جاس» دەپ اتالعان وسى بەتتىڭ رەداكتورى ە. الدوڭعاروۆ بولدى.
1925 -جىلدان باستاپ «جاس قايرات» اتتى دەربەس گازەت بولىپ شىقتى.
2005 -جىلى قازاقستاندا ءبىرىنشى حالىقارالىق اربيتراجدى سوت اشىلدى.
2004 -جىلى 28- جەلتوقساندا قازاقستان رەسپۋبليكاسىنىڭ «ارالىق سوتتار تۋرالى» جانە «حالىقارالىق كوممەرتسيالىق اربيتراج تۋرالى» زاڭدارىنىڭ قابىلدانۋى بۇعان نەگىز بولدى. قازاقستاندىق حالىقارالىق اربيتراج - تۇراقتى قىزمەت ەتەتىن اربيتراجدى ينستيتۋت.
2006 -جىلى قازاقستاندا «قۇرمەتتى ماشينا جاساۋشى» بەلگىسى تاعايىندالىپ، ول ق ر يندۋستريا جانە ساۋدا ءمينيسترىنىڭ اتىنان بەرىلەتىن بولدى.
2007 -جىلى الماتىدا «MG Production» پروديۋسەرلىك كومپانياسى «قازاقستاننىڭ التىن ادامدارى» سەرياسىنىڭ «پەسني دۋشي» اتتى دەرەكتى فيلمىن ۇسىندى. فيلم اتى اڭىزعا اينالعان تانىمال ءانشى جانە ءار ءتۇرلى تاريحي كەزەڭدەردىڭ كۋاگەرى بيبىگۇل تولەگەنوۆا ومىرىنەن بەيمالىم دەرەكتەردى قامتيدى.
فيلم ءانشى شىعارماشىلىعىنىڭ 55 جىلدىعىنا ارنالادى. رەجيسسەرلەرى - اسيا سۇلەيەۆا جانە ءانۋار رايبايەۆ.
2010 -جىلى بەرليندەگى «World Money Fair» حالىقارالىق كورمەسىندە Krause Publications وتكىزەتىن كونكۋرستىڭ قورىتىندىسى بويىنشا «تاريحي تاقىرىپ بويىنشا ەڭ ۇزدىك مونەتا» اتالىمىندا قازاقستان رەسپۋبليكاسى ۇلتتىق بانكىنىڭ «ۇلى قولباسشىلار» سەرياسىنان شىعارىلعان «شىڭعىس حان» ەسكەرتكىش كۇمىس مونەتاسى ماراپاتتالدى.
كونكۋرس شەڭبەرىندە بىرنەشە اتالىمدا مونەتا سارايلارىندا سوعىلعان نەمەسە مەملەكەتتىك ورگاندار - ەميتەنتتەر شىعارعان ەڭ ۇزدىك مونەتالار ايقىندالدى. كونكۋرستىق كوميسسيا شارا كەزىندە شىعارىلعان كوللەكتسيالىق جانە ەسكەرتكىش مونەتالاردى دەربەس ىرىكتەپ الدى. مونەتالاردى باعالاۋ ديزاينىنىڭ تارتىمدىلىعىن، كوركەمدىك ورىندالۋىن جانە سوعىلۋ ساپاسىن باعالاۋعا نەگىزدەلدى. «ۇلى قولباسشىلار» سەرياسىنان نومينالى 100 تەڭگەلىك «CHINGIZ KHAN» مونەتاسى 2008 -جىلعى 31- مامىردا اينالىسقا شىعارىلعان.
2012 -جىلى گەرمانيا استاناسى بەرليندە ەۋرازيالىق كلۋبىنىڭ اشىلۋ سالتاناتى ءوتتى. اتالعان كلۋب قازاقستان رەسپۋبليكاسى مەن گەرمانيا فەدەراتيۆتىك رەسپۋبليكاسىنىڭ، سونداي-اق ەۋروپالىق وداق اراسىنداعى قوعامدىق-ساياسي ماسەلەلەردىڭ كەڭ اۋقىمىن تالقىلاۋعا ارنالعان ديالوگ الاڭى بولىپ تابىلادى.
بۇل قازاقستاننىڭ ەۋروپاداعى جاڭا مۇمكىندىكتەردى قاراستىرۋ، ەۋروپالىق جانە ازيالىق مادەنيەتتەر اراسىندا ديالوگتى نىعايتۋ باعىتىنداعى تۇڭعىش جوباسى بولىپ وتىر.
2012 -جىلى الماتىدا ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (ا و س ش ك) ءبىرىنشى كەزدەسۋى اياقتالدى. وعان 15 مەملەكەتتىڭ سىرتقى ىستەر جانە قورعانىس مينيسترلىكتەرىنىڭ وكىلدەرى قاتىستى.
2014 -جىلى كانادا مەن يامايكادا قازاقستاننىڭ ەلشىلىگىن قوسا اتقارۋشى كونستانتين جيگالوۆ كينگستوندا گەنەرال-گۋبەرناتور پاتريك اللەنگە ەكى ەل اراسىنداعى ديپلوماتيالىق قاتىناستار ورناعان ساتتەن باستاپ يامايكاداعى (قوسا اتقارۋشى) العاشقى قازاقستاندىق ەلشى رەتىندە اككرەديتتەيتىن سەنىم گراموتاسىن تابىستادى.
2015-جىلى كانادانىڭ كالگاري قالاسىندا قازاقستاندىق ارداگەر كونكيشى ۆلاديمير كوستين +35 جاس دارەجەسىندە 3000 مەتر قاشىقتىقتا جاڭا الەمدىك رەكورد ورناتتى. سپورتشىنىڭ ۋاقىتى 3.57,49 قۇرادى. Masters ساناتىنداعى جاڭا رەكورد كوپسايىستان الەم چەمپيوناتى اياسىندا ورناتىلدى.
2016 -جىلى تەگەراندا قازاقستان رەسپۋبليكاسى مەن يران يسلام رەسپۋبليكاسىنىڭ ىسكەرلىك كەڭەسى ءوتتى. 2015 -جىلدىڭ قازانىندا قازاقستان مەن يران ىسكەرلىك كەڭەسىنىڭ ىنتىماقتاستىعى تۋرالى مەموراندۋمعا قول قويىلدى.
2017 -جىلى شۆەتسيانىڭ بۋروس قالاسىندا وتكەن Golden Girl تۋرنيرىندە قازاقستاننىڭ بوكسشى قىزدارى 3 التىن، 2 كۇمىس جانە 6 قولا مەدال جەڭىپ الدى. تۋرنيرگە الەمنىڭ 22 ەلىنەن 254 سپورتشى قاتىستى.
2017 -جىلى الماتىدا 28-بۇكىل الەمدىك قىسقى ۋنيۆەرسيادا-2017 ويىندارى رەسمي تۇردە جابىق دەپ جاريالاندى. ۋنيۆەرسيادانىڭ جابىلۋ سالتاناتى جارىستاردىڭ سيمۆوليكالىق الاۋىن سوندىرۋمەن اياقتالدى. جالپى كوماندالىق ەسەپتە قازاقستان قۇراماسى ەكىنشى ورىن الدى. ولاردىڭ ەنشىسىندە 11 التىن، 6 كۇمىس جانە 17 قولا بار.
2019 -جىلى الماتى قالاسىنىڭ ورتالىق مەملەكەتتىك عىلىمي- تەحنيكالىق قۇجاتتاما ءارحيۆى مەگاپوليستىڭ ءدىني عيماراتتارىن قۇرۋ تاريحىنان العاش رەت قۇجاتتار جاريالاعان جيناقتى تانىستىردى.