استانادا 8-قاباتتان ەر ادام قۇلاپ كەتىپ، ىزىنشە ايەل تومەنگە سەكىردى
«21 - ماۋسىم كۇنى ساعات 19.22 دە قالالىق توتەنشە جاعدايلار دەپارتامەنتىنىڭ جەكە قۇرامىنان 7 ادام جانە 2 تەحنيكا سۋيتسيدكە بارعالى تۇرعان ايەل تۋرالى حابار بويىنشا قابانباي باتىر، 40 مەكەنجايىنا («ينفينيتي» تۇرعىن ءۇي كەشەنى) شىقتى. سەگىزىنشى قاباتتاعى تەرەزەدەن ايەل سەكىرۋگە وقتالىپ تۇرعانى انىقتالدى. قۇتقارۋشىلار دەرەۋ «ءومىر كۋبىن» (اۋا تولى جاستىقشا) دايىندادى. سەبەبى اۆتوساتىنى اشۋعا تۇراقتاعى كولىك كەدەرگى جاسادى. ايەل قۇتقارۋشىلاردىڭ ارەكەتىن بايقاپ، اۋلانىڭ كەلەسى بەتىنە اۋىستى جانە ايتىلىپ جاتقان سوزدەرگە ءمان بەرمەدى»، - دەدى توتەنشە جاعداي دەپارتامەنتىنەن.
34 جاستاعى كەلىنشەك تومەنگە سەكىرگەن. ول قۇتقارۋشىلار دايىنداعان اۋا جاستىقشاسىنا قۇلاپ، ەكپىنمەن جەرتولەگە كىرەبەرىستە ورناتىلعان كۇنقاعاردىڭ ۇستىنە تۇسكەن. ول بىردەن جەدەل جاردەم كولىگىنە جاتقىزىلدى.
ت ج د- دان ءمالىم ەتكەندەي، كەلىنشەك تۋرالى حابار تۇسكەنگە دەيىن جوعارى قاباتتان ەر ادام قۇلاعان.
«بىزگە اتالمىش حابار تۇسكەنگە دەيىن جوعارى قاباتتان ەر ادام قۇلادى (نەمەسە سەكىردى). ونى دا جەدەل جاردەم كولىگى الىپ كەتىپ، كوپتەگەن جاراقاتپەن اۋرۋحاناعا جەتكىزدى. قازىرگى ۋاقىتتا كەلىنشەك پەن ەر ادام 2-قالالىق كوپسالالى اۋرۋحانادا جاتىر. ەر ادامنىڭ جاعدايى اۋىر. ايەلگە مەديتسينالىق تەكسەرۋ جۇرگىزىلۋدە»، - دەلىنگەن اقپاراتتا.
نۇر-سۇلتان قالالىق پوليتسيا دەپارتامەنتىنىڭ اقپاراتىنا سايكەس، كەشە ساعات 18.45-تە پوليتسيا بولىمىنە قابانباي باتىر كوشەسىندەگى ءۇيدىڭ 8-قاباتىنان ەر ادامنىڭ قۇلاپ كەتكەنى تۋرالى اقپارات تۇسكەن.
وقيعا بويىنشا «ءوزىن-ءوزى ولتىرۋگە دەيىن جەتكىزۋ بابىمەن» قىلمىستىق ءىس قوزعالدى.