قوردايداعى توبەلەستە جاراقات العان 8 ادامنىڭ جاعدايى اۋىر

نۇر- سۇلتان. قازاقپارات - دەنساۋلىق ساقتاۋ ۆيتسە- ءمينيسترى ءلاززات اقتايەۆا قوردايداعى قاقتىعىس سالدارىنان 165 ادامنىڭ زارداپ شەككەنىن ءمالىم ەتتى، دەپ حابارلايدى قازاقپارات ءتىلشىسى.

«9 - اقپان ساعات 11.00-دەگى مالىمەت بويىنشا توبەلەس سالدارىنان 165 ادام زارداپ شەكتى. ولاردىڭ ءبارى مەديتسينالىق كومەك الۋعا كەلگەن. تۇرعىلىقتى جەرى بويىنشا مەديتسينالىق ۇيىمدارعا - 140 ادام، قىرعىزستانداعى مەديتسينالىق ۇيىمعا - 25 ادام جۇگىنگەن. اۋرۋحاناعا جۇگىنگەندەردىڭ ىشىندە 115 ادامعا امبۋلاتوريالىق ەم جاسالدى. ياعني، امبۋلاتوريالىق كومەك دەگەنىمىز - تاۋلىك بويى باقىلاۋدى قاجەت ەتپەيتىن ەم ءتۇرى»، - دەدى ءلاززات اقتايەۆ و ك ق- دا وتكەن باسپا ءسوز ءماسليحاتىندا.

ونىڭ ايتۋىنا قاراعاندا، جالپى 50 ادام، ونىڭ ىشىندە 40 ادام - قازاقستاننىڭ، 10 ادام - قىرعىزستاننىڭ اۋرۋحانالارىنا جاتقىزىلعان.

«قازاقستانداعى اۋرۋحاناعا جاتقىزىلعانداردىڭ ىشىندە تۇراقتى اۋىر جاعدايدا 30 ادام، ال اسا اۋىر جاعدايدا 8 ادام بار. قايتىس بولعانداردىڭ سانى - 10. وقيعا ورنىندا 8، ال تاعى 2 ادام مەديتسينالىق مەكەمەدە قايتىس بولدى. قازىرگى تاڭدا ءالى 8 ادام جانساقتاۋ بولىمىندە جاتىر»، - دەدى ءلاززات اقتايەۆا.

«14 جەدەل جاردەم كولىگى جۇمىلدىرىلعان. ونىڭ ەڭ العاشقىسى توعىز مينۋتتىڭ ىشىندە جەتكەن. سونىمەن قاتار ساناۆياتسيا بريگاداسى دا تارتىلدى. ەكى تىكۇشاقتىڭ كومەگىمەن زارداپ شەككەن اۋىر جاعدايداعى ەكى ادام الماتىعا جەتكىزىلدى. ولار الماتى قالاسىنداعى №7 كلينيكالىق اۋرۋحاناعا جاتقىزىلدى. ءتورت ادام جەرۇستى كولىگىمەن جەتكىزىلىپ، ەكەۋى - قالالىق ءتورتىنشى اۋرۋحاناعا، بىرەۋى - جەدەل مەديتسينالىق كومەك اۋرۋحاناسىنا، قالعان بىرەۋى - الماتىداعى كوپقىزمەتتى №6 كلينيكالىق اۋرۋحاناعا جاتقىزىلدى»، - دەدى ءلاززات اقتايەۆا.

ۆيتسە- مينيستر زارداپ شەككەندەردى ەمدەۋگە بىلىكتى دارىگەرلەردىڭ تارتىلعانىن ايتىپ ءوتتى.

اۆتور: ايان بەكەن ۇلى