كولىكتى ماس كۇيىندە باسقارعاندار جۇرگىزۋشى كۋالىگىنەن 8 جىلعا ايىرىلادى
«ماس كۇيىندە كولىك جۇرگىزگەنى ءۇشىن جاۋاپكەرشىلىكتى كۇشەيتۋدى ۇسىنىپ وتىرمىز. قازىر ماس بولسىن، ساۋ بولسىن ادامدى ماشينامەن قاعىپ ءولتىرىپ السا، جازا بىردەي، ارى كەتسە بەس جىل. ەندى ماس كۇيىندە جاسالعان وسىنداي قىلمىس ون جىلعا باس بوستاندىعىنان ايىرىپ، ءومىربويى كولىك قۇرالدارىن باسقارۋ قۇقىعىنان ايىرىلادى»، - دەدى م. احمەتجانوۆ پارلامەنت ءماجىلىسىنىڭ جالپى وتىرىسىندا.
ونىڭ سوزىنە قاراعاندا، اكىمشىلىك قۇقىق بۇزۋشىلىق كودەكسىنە ماس كۇيىندە كولىك ايداعانى ءۇشىن 30 تاۋلىككە دەيىن اكىمشىلىك قاماۋ مەرزىمى ۇزارتىلىپ، جۇرگىزۋ قۇقىعىنان ايىرۋ مەرزىمى سەگىز جىلعا ۇلعايادى.
ايتا كەتەيىك، بۇگىن جالپى وتىرىستا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جانە قىلمىستىق-پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاپ، ءبىرىنشى وقىلىمدا ماقۇلدادى.
وسى ورايدا، ۇرلىققا قاتىستى ارەكەتتەر اۋىر قىلمىستار ساناتىنا كوشەتىنى ءمالىم بولدى.
سونىمەن قاتار، ينسپەكتوردى جانە قورىقشىنىڭ ومىرىنە قاۋىپ ءتوندىرىپ، كۇش قولدانعانى ءۇشىن جاۋاپكەرشىلىك ەنگىزۋ قاراستىرىلعان. وسىنداي قىلمىستار ءۇشىن جيىرما جىلعا دەيىن باس بوستاندىعىنان ايىرىلماق.