قازاقستاندا يپوتەكا 8 پروتسەنتكە دەيىن ءتۇسىپ كەتۋى مۇمكىن

استانا. قازاقپارات - ق ر ينۆەستيتسيالار جانە دامۋ ۆيتسە-ءمينيسترى قايىربەك وسكەنبايەۆ يپوتەكانى قالايشا ارزانداتۋعا بولاتىنىن ءتۇسىندىرىپ بەردى، دەپ حابارلايدى قازاقپارات ءتىلشىسى.

«ءبارىمىز جاقسى بىلەمىز، يپوتەكانى قاي بانكتەن الساق تا، مولشەرلەمەسى 10 پروتسەنتتەن تومەن تۇسپەيدى. قازىرگى كەزدە ءبىز ونى 8 پروتسەنتكە دەيىن تومەندەتۋ بويىنشا ۇكىمەتكە ۇسىنىس بەرىپ وتىرمىز. ونى قولداي ما، قولداماي ما، ازىرشە بىلمەيمىز. سوسىن بانكتەرمەن دە سويلەسىپ جاتىرمىز. جالعىز ج س ب ك (تۇرعىن ءۇي قۇرىلىس جيناق بانكى - اۆت. ) عانا ەمەس، باسقا بانكتەر دە وسى جۇمىسقا كىرىسسە ەكەن دەگەن ويىمىز بار»، - دەدى ق. وسكەنبايەۆ قازاقپارات تىلشىسىنە بەرگەن سۇحباتىندا.

ۆيتسە-ءمينيستردىڭ ايتۋىنشا، يپوتەكانى ارزانداتۋ ءۇشىن بانكتەردى سۋبسيديالاۋ قاجەت. «بانكتەردىڭ يپوتەكاسى نەگە قىمبات؟ ويتكەنى ولار اقشانى ۇلتتىق بانكتەن الادى، ءيا بولماسا، حالىقتىڭ دەپوزيتكە سالعان اقشاسىن پايدالانادى. بۇل جەردە دەپوزيتتىڭ سىياقىسىن، ياعني 8-9 پروتسەنتىن سالىمشىلارعا بەرۋ كەرەك. وعان تاعى ءوز ۇستەمەاقىسىن قوسادى. سول سەبەپتى بۇگىندە يپوتەكانىڭ مولشەرلەمەسى 14-15 پروتسەنتكە دەيىن بارادى. قازىرگى كەزدە ءبىز 4-5 پروتسەنتىن الامىز دا، 10 پروتسەنتىن حالىق تولەيدى. ونداي جۇيە بار (قازاقستاننىڭ يپوتەكالىق كومپانياسى ارقىلى بەرىلەتىن يپوتەكا - اۆت. ). ەندى، ءبىز وسىنى تەرەڭدەتىپ، 8 پروتسەنتكە دەيىن تۇسىرەيىك دەگەن ۇسىنىس جاساپ وتىرمىز. ونى ۇكىمەت قولداي ما، قولداماي ما، ءالى بىلمەيمىز»، - دەپ اتاپ كورسەتتى ق. وسكەنبايەۆ.

ارمان اسقاروۆ