فيرۋزا ءشارىپوۆا كاسىپقوي بوكستاعى 8- جەڭىسىنە قول جەتكىزدى
دەپ حابارلايدى «قازاقپارات» ح ا ا ءتىلشىسى.
الماتىدا وتكەن بوكس كەشىندە فيرۋزامەن بىرگە قازاق كۇرەسىنىڭ قاس شەبەرلەرى ۇلان رىسقۇل مەن بەيبىت ىستىبايەۆ شارشى الاڭعا بىرگە شىعىپ، وتانداسىمىزعا قولداۋ ءبىلدىردى. فيرۋزانىڭ ءوزى دە قازاق كۇرەسىنىڭ كيىمىن كيىپ شىقتى. بوكسشىلار IBO جانە WBS Silver بەلبەۋلەرىن ساراپقا سالدى.
العاشقى راۋند قارسىلاسىنان گورى قيمىلى شيراق فيرۋزانىڭ باسىمدىعىمەن باستالدى. دجەميللادان قاراعاندا كاسىبي شەبەرلىگىنىڭ جوعارىلىعى وتانداسىمىزدىڭ بەلگيالىقتان وق بويى وزىق ەكەندىگىن بايقاتتى. بوكس الەمىندە «پيتبۋل» اتانعان بەلگيالىق كوبىندە شابۋىلداۋمەن بولدى. ءبىراق قورعانىسى مىعىم فيرۋزاعا ەكىنشى راۋندتا دا جارىتىپ سوققى جاساي المادى.
فيرۋزانىڭ بىرنەشە رەتكى سوققىسىنا قاراماستان بەلگيالىق بوكسشى فيزيكالىق تۇرعىدا كۇش- قۋاتى مول ەكەنىن تانىتا ءبىلدى. الايدا جىلدامدىق تۇرعىسىنان فيرۋزاعا ەسەسى كەتىپ جاتقانى ايقىن ەدى. ءتورتىنشى راۋندتىڭ سوڭىندا فيرۋزانىڭ بەلسەندىلىگى قاتتى بايقالدى. سوققىنىڭ ءبارىن قابىلداپ تۇرسا دا، بارلىق راۋندتا دا بەلگيالىق باستىرمالاتىپ العا ءجۇرۋىن توقتاتپادى. الايدا شابۋىلىنىڭ ەشقايسىسى ناتيجەلى ەمەس ەدى.
اقىرى، قوس بوكسشىنىڭ تەكەتىرەسى 10 راۋندقا دەيىن سوزىلدى. تورەشىلەردىڭ تالاسسىز شەشىشىمەن فيرۋزا ايقاستا جەڭىمپاز دەپ تانىلدى.
ايتا كەتسەك، بۇل كاسىپقوي بوكستاعى فيرۋزا ءشارىپوۆانىڭ 8- جەڭىسى. وسىعان دەيىن فيرۋزا تەك رەسەيلىك سوفە وچيگاۆەدەن ۇپاي سانى بويىنشا جەڭىلگەن بولاتىن.
اۆتور: ايان بەكەن ۇلى
