قازاقستان ءتۇرلى سەبەپتەرمەن شەتەلگە 8 ادامدى بەرۋدەن باس تارتتى
بۇل تۋرالى پارلامەنت سەناتىنىڭ جالپى وتىرىسىنان كەيىن تىلشىلەرگە ق ر باس پروكۋرورىنىڭ ورىنباسارى مارات احمەتجانوۆ ءمالىم ەتتى، دەپ حابارلايدى قازاقپارات.
«بۇگىندە قازاقستان قۇقىقتىق شارتتارعا بايلانىستى 55 مەملەكەتپەن قول قويدى. بۇل ءوز كەزەگىندە ءبىزدىڭ قۇقىقتىق ۇستەمدىككە سەنىم ارتقاندىعىن بىلدىرەدى. ويتكەنى ءاربىر وسىنداي قۇجات بويىنشا ءبىز وزىمىزگە ءتيىستى مىندەتتەمەنى الامىز. سوندىقتان جىل سايىن شامامەن 100 دەن استام ادامدى ءبىز بەرەمىز. سونىمەن قاتار بىلتىر ءبىزدىڭ سۇراۋىمىز بويىنشا 103 ازامات قازاقستانعا بەرىلدى، ال 85 ادامدى باسقا ەلدەردىڭ سۇراۋىمەن ولارعا تاپسىردىق. بۇل قۇقىقتىق كومەكتى كورسەتۋ بارىسىنداعى قادامدار»، - دەدى م. احمەتجانوۆ.
ونىڭ سوزىنە قاراعاندا، وتكەن جىلى جالپى 8 ادامدى بەرۋدەن باس تارتىلدى.
«بۇل تۇرعىدا تەك ساياسي سەبەپتەر عانا ەمەس، جالپى باس تارتۋعا نەگىز بولاتىن توعىز تالاپ ەسكەرىلدى. بىرىنشىدەن، ءبىزدىڭ جانە ولاردىڭ زاڭناماسى بويىنشا وسى ازاماتتاردىڭ ارەكەتى قىلمىستىق سيپاتقا يە بولۋى ءتيىس. ەكىنشىدەن، ءاربىر اكتىگە جەكەلەي قاراستىرىلادى، ەگەر ادام بوسقىن مارتەبەسىنە يە بولسا، وندا ونى بەرۋدەن باس تارتىلادى. وزدەرىڭىز بىلەسىزدەر، وسى سالادا ب ۇ ۇ ۇسىنىستارى بار. ادامدار وسى تالاپتاردىڭ اياسىندا قامتىلسا، ءبىز بۇل باعىتتا حالىقارالىق قۇقىق ستاندارتتارىن ۇستانىپ، سۇرالعان ازاماتتاردى بەرمەيمىز»، - دەپ ءتۇسىندىردى باس پروكۋروردىڭ ورىنباسارى.
ايتا كەتەيىك، بۇگىن سەناتتىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسى مەن سەربيا رەسپۋبليكاسى اراسىنداعى قىلمىستىق ىستەر بويىنشا قۇقىقتىق كومەك تۋرالى شارتتى راتيفيكاتسيالاۋ تۋرالى»، «قازاقستان رەسپۋبليكاسى مەن سەربيا رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى»، «قازاقستان رەسپۋبليكاسى مەن سەربيا رەسپۋبليكاسى اراسىنداعى ۇستاپ بەرۋ تۋرالى شارتتى راتيفيكاتسيالاۋ تۋرالى» زاڭ جوبالارىن قابىلدادى.
اۆتور: رۋسلان عابباسوۆ
