ۇرىمجى- قورعاس- استانا پويىزى قىتايعا ساپاردى 8 ساعاتقا قىسقارتادى

استانا. قازاقپارات - قورعاس شەكارا بەكەتى مەن الماتى قالاسىن باسىپ وتەتىن ءۇرىمجى- استانا باعىتىنداعى العاشقى حالقارالىق جولاۋشىلار پويىزى ىسكە قوسىلدى، دەپ حابارلايدى قازاقپارات.

قىتايداعى تيان- شان پورتالىنىڭ حابارلاۋىنشا، 30 قىتايلىق جانە قازاقستاندىق جولاۋشىسى بار №9001 حالقارالىق جولاۋشىلار پويىزى 8 - ماۋسىم كۇنى قىتاي جاعىنداعى «قورعاس» تەمىرجول ستانساسىنان قازاقستاننىڭ «التىنكول» ستانساسىنا اتتاندى.

 بۇل قورعاس تەمىرجول جەلىسى ارقىلى جولعا شىققان العاشقى جولاۋشىلار پويىزى. ءۇرىمجى قالاسىنان قىتايلىق «قورعاس» ستانساسىنا دەيىن كۇن سايىن قاتىنايتىن №K9765 جولاۋشىلار پويىزى، قورعاستان وتكەن سوڭ №9001 حالىقارالىق پويىزى بولىپ وزگەرىپ قازاق جەرىندەگى «التىنكول» ستانساسىنا كەلىپ توقتايدى. مارشۋتتىڭ جولاۋشىلارى «التىنكول» ستانساسىنا جەتكەن سوڭ سول جەردەگى №701 جولاۋشىلار پويىزىنا اۋىسىپ وتىرادى. تەمىر جول كولىگى بۇدان سوڭ الماتى جانە سارىشاعان ارقىلى استانا قالاسىنا جەتەدى.

ايتا كەتەرلىگى، پويىز الاتاۋ- دوستىق شەكارا بەكەتىنەن وتەتىن ءۇرىمجى- استانا باعىتىنداعى مارشۋتتان كەيىنگى قىتايدان قاتىنايتىن ەكىنشى جولاۋشىلار پويىزى. قىتايلىق پورتالدىڭ حابارلاۋىنشا، وسى باعىت الاتاۋدان الماتىعا باراتىن تەمىرجولدى 378 شاقىرىمعا قىسقارتادى. ءارى پويىزدى كەڭ رەلسكە شاقتالعان دوڭگەلەككە اۋىستىرماي- اق «التىنكول» ستانساسىندا كۇتەتىن №701 جولاۋشىلار پويىزىنا وتىرىپ، بىردەن الماتىعا شىعادى. سوندىقتان پويىز وڭتۇستىك استاناعا دوستىق ارقىلى قاتىنايتىن باعىتتاعى جولاۋشىلار پويىزىنان 8 ساعاتقا جىلدامىراق جەتەدى.