الماتىدا 8-ۇلتتىق دەلفي ويىندارى ءوتتى
قازاقستان ۇلتتىق دەلفي ويىندارى بيىل الماتى قالاسى جاستار ساياساتى ماسەلەلەرى جونىندەگى باسقارماسىنىڭ قولداۋىمەن، الماتى جاستارىنىڭ كونگرەسى، ستۋدەنتتەر اليانسىنىڭ ۇيىمداستىرۋىمەن XIII رەت وتكىزىلدى.
ويىندار جاس تالانتتاردى تاۋىپ، ولاردى قولداۋ، وسكەلەڭ ۇرپاق اراسىندا مادەني مۇرانى ناسيحاتتاۋ، ولارعا رۋحاني، ەستەتيكالىق تاربيە بەرۋ، مادەنيەتارالىق ديالوگ پەن ۇلتتىق ونەردىڭ دامۋىنا ىقپال ەتۋدى كوزدەيدى.
بايقاۋدا ەڭ ۇزدىك دەپ تانىلعان جەڭىمپازدار رەسپۋبليكالىق ۇلتتىق دەلفي ويىندارىنا الماتى اتىنان قاتىساتىن بولادى. ۇلتتىق دەلفي ويىندارىندا جەڭىس تۇعىرىنان كورىنگەن جاستار حالىقارالىق دەلفي ويىندارىنا جولداما الادى.
بايقاۋدىڭ ناتيجەسى بويىنشا ەڭ ۇزدىك دەپ تانىلعان جەڭىمپازدار: «سكريپكا» نوميناتسياسى بويىنشا - اقىنگەر ايلين (10-15 جاس) مەن بەكتۇروۆا ماليكا (16-21 جاس)، «كيىم ديزاينى» نوميناتسياسىندا پەرنەبايەۆا گاۋھار، دومبىرا جانرى بويىنشا شاكەنبايەۆ مۇحامەدالى (10-15 جاس) مەن جۇلەكەن جاندوس (16-21 جاس)، «ءداستۇرلى حالىق ءانى» اتالىمى بويىنشا ەرعالينا بالاۋسا، «فوتوسۋرەت» شەبەرلەرىنىڭ اراسىندا جاكايەۆا وفەليا ارنايى ماقتاۋ قاعازىمەن، باعالى سىيلىقتارمەن ماراپاتتالدى.
قيمىلىنا كوز ىلەسپەس مىڭ بۇرالعان بيشىلەردىڭ اراسىنداعى باسەكەدە باس جۇلدەنى «زاماناۋي ءبي» نوميناتسياسىندا «SAAD» ءبي توبى، «حالىق ءبيى» اتالىمىندا ءارتۇرلى جاس ەرەكشەلىكتەرىنە وراي، «سارمات» (10-15 جاس ارالىعى) پەن «نۇربي» (16-21 جاس) ءبي توپتارى قانجىعالارىنا بايلادى. ەندى اتالعان جەڭىمپازداردىڭ بارلىعى الماتى قالاسىنىڭ نامىسىن رەسپۋبليكالىق ۇلتتىق دەلفي ويىندارىندا قورعايتىن بولادى.
ۇلتتىق دەلفي ويىندارىندا جەڭىس تۇعىرىنان كورىنگەن جاستار حالىقارالىق دەلفي ويىندارىندا ەلىمىزدىڭ اتىنان ونەر كورسەتەدى. دەلفي ويىندارى - قاتىسۋشىلار اراسىنان تالانتتى تۇلعالار مەن ەرەكشە دارىندى جاستاردى ىرىكتەپ الۋعا باعىتتالعان، كلاسسيكادان باستاپ قازىرگى زامانعا دەيىنگى ونەردىڭ بارلىق ءتۇرىن بىرىكتىرەتىن كەشەندى بايقاۋ.
وليمپيادا ويىندارىمەن بىرگە ەجەلگى گرەكيا جەرىندە دۇنيەگە كەلىپ، XX عاسىردا قايتا جاندانا باستاعان دەلفي ويىندارى بۇگىندە الەمنىڭ 100 گە تارتا مەملەكەتىندە قولداۋ تاپقان.