قازاقستاننىڭ 8 وبلىسىندا سۋ تاسقىنىنا قارسى شارالار ءجۇرىپ جاتىر

استانا. قازاقپارات - اقمولا، الماتى، شىعىس قازاقستان، جامبىل، قاراعاندى، اقتوبە، قوستاناي جانە سولتۇستىك قازاقستان وبلىستارىندا سۋ تاسقىنىنا قارسى شارالار جالعاسۋدا،

 دەپ حابارلايدى ق ر ءى ءى م  ت ج كوميتەتىنىڭ باسپا ءسوز قىزمەتى.

رەسپۋبليكانىڭ 8 وڭىرىندە ت ج كوميتەتى بولىمشەلەرىنىڭ، جەرگىلىكتى اتقارۋ ورگاندارىنىڭ، ۇلتتىق گۆارديانىڭ، جەرگىلىكتى پوليتسيا قىزمەتىنىڭ جەكە قۇرامىنان  1186 ادام، 276 تەحنيكا، 21 سۋ سورۋ قۇرىلعىسى جانە 20 ءجۇزۋ قۇرالى جۇمىلدىرىلدى.

 اقمولا وبلىسىنىڭ سەلينوگراد اۋدانىندا سۋدى سورعىتۋ، سۋدىڭ ارعى بەتىندە قالىپ قويعان حالىقتى وتكىزۋ جانە ولارعا ازىق- تۇلىك ونىمدەرىن جەتكىزۋ، قاپتاردى دايىنداۋ جۇمىستارى جالعاسىن تابۋدا. زەرەندى، ەسىل جانە جارقايىڭ اۋداندارىندا تاۋلىك بويى كەزەكشىلىك ۇيىمداستىرىلعان. ەسىل اۋدانىنىڭ زنامەنكا اۋىلىندا جەرگىلىكتى اتقارۋ ورگاندارى حالىققا اۋىز سۋ تاسىپ جاتىر.

سولتۇستىك قازاقستان وبلىسى  قىزىلجار اۋدانىنداعى تەپليچنوە، زارەچنوە اۋىلدارىندا جانە زارەچنوە كەنتىندە قۇتقارۋشىلار حالىقتى، ازىق- تۇلىك ونىمدەرىن، مالعا ارنالعان جەمدى تاسىمالداپ جاتىر. مەديتسينالىق كومەك كورسەتۋ، ينەرتتى ماتەريالى بار قاپتار توسەۋ، بوگەتتەردى نىعايتۋ جانە ەسىل وزەنىندەگى سۋ دەڭگەيىن باقىلاۋ جۇمىستارى جۇرگىزىلۋدە. الماتى وبلىسىندا اپاتتىق- قۇتقارۋ جۇمىستارى، قىرعاۋىلدى وزەنىنىڭ ارناسىن تازارتۋ، جاعاسىن نىعايتۋ، اعىپ كەلگەن سۋ دەڭگەيىن باقىلاۋ جۇمىستارى ءجۇرىپ جاتىر. قوستاناي وبلىسى قاراسۋ اۋدانىنىڭ جامبىل كەنتىندە قۇتقارۋشىلار مەن جەرگىلىكتى اتقارۋ ورگاندارى ەرىگەن قار سۋىن سورعىتۋ جانە ولاردى بۇرۋ جۇمىستارى توقتاعان جوق.

 اۆتوجولداردا قالپىنا كەلتىرۋ جۇمىستار جۇرگىزىلۋدە، كەزەكشىلىك ۇيىمداستىرىلۋدا. قاراعاندى وبلىسىندا جەرگىلىكتى پوليتسيا قىزمەتى سۋ اعىنىنان بۇلىنگەن اۆتوجولدارعا بەكەتتەر قويىپ، قوعامدىق ءتارتىپتى ساقتاۋدى ۇيىمداستىردى. اقتوبە وبلىسىنىڭ جەرگىلىكتى پوليتسيا قىزمەتى باقشا ۇجىمدارىن پاترۋلدەۋ جانە قوعامدىق ءتارتىپتى ساقتاۋدى جالعاستىرۋدا. شىعىس قازاقستان وبلىسى بەسقاراعاي اۋىلىندا قۇتقارۋشىلار جەر استى سۋلارىن سورعىتىپ جاتىر. سۋ تاسقىنى كەزەڭى باستالعاننان بەرى قوسىمشا  46958 مەتر ۋاقىتشا بوگەت تۇرعىزىلدى، ينەرتتى ماتەريالى بار  251919 قاپ تولتىرىلىپ، توسەلدى.