استانا 8- ناۋرىز مەرەكەسىن قالاي اتاپ وتەدى؟
ەلوردالىق تەاترلار مەن «استانا» كونسەرت زالى ەلوردا تۇرعىندارى مەن قوناقتارىن 8- ناۋرىزعا ورايلاستىرىلعان سپەكتاكلدەر مەن كونسەرتتەرگە شاقىرادى.
قالا تۇرعىندارى ءۇشىن «جىگىتتەر» توبىنىڭ ەسەپتىك كونسەرتى ناعىز سىي بولماق، ول 8- ناۋرىز كۇنى «استانا» كونسەرت زالىندا (بۇرىنعى «كونگرەسس-حولل») ساعات 16:00 جانە 19:00 دە وتەدى.
سونداي-اق، 9- ناۋرىزدا ساعات 18:30 «الداراسپان» ءازىل-سىقاق كەشى كوپشىلىككە كوتەرىڭكى كوڭىل كۇي سىيلايدى. «استانا وپەرا» تەاترىنىڭ ۇلكەن زالىندا حالىقارالىق ايەلدەر كۇنىنە ورايلاستىرىلعان «ي نەت تەبيا پرەكراسنەي...» مەرەكەلىك كونسەرتى ۇيىمداستىرىلادى.
وعان قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ جەتەكشىلىك ەتكەن «استانا وپەرا» سيمفونيالىق وركەسترى مەن حور قاتىسادى.
ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىندا 7- ناۋرىز كۇنى ساعات 16:00 س. بالعابايەۆتىڭ «ەڭ جاقسى ەركەك» سپەكتاكل-كومەدياسى بولادى، ال، 8- ناۋرىز كۇنى 18:30 كورەرمەندەر م. بايجيەۆتىڭ «ءتىل تابىسقاندار» كومەديالىق قويىلىمىن كورە الادى.
سونىمەن قاتار مەرەكەلەۋ شەڭبەرىندە مۋزەيلەردە، كىتاپحانالاردا جانە تاۋەلسىزدىك سارايىندا تاقىرىپتىق كورمەلەر وتەدى. تاۋەلسىزدىك سارايىنداعى «گۇلدىڭ ءنارى» اتتى كورمە 2- ساۋىرگە دەيىن جالعاسادى. ناۋرىزدىڭ 6 سى مەن 13 ءى ارالىعىندا «الجير» مۇراجايىندا 8- ناۋرىزعا ارنالعان بالالاردىڭ سۋرەتتەرىنىڭ ەكسپوزيتسياسىن تاماشالاۋعا بولادى.
مۇنىمەن قوسا، قالا مەرەكەگە وراي بەزەندىرىلەدى. استانانىڭ قىسقى كەلبەتى كوكتەمگى جاڭارۋدى بىلدىرەتىن دەكوراتسيالارىمەن الماستىرىلادى. ەلوردانى 8- ناۋرىز بەن ناۋرىز مەرەكەسىنە وراي بەزەندىرۋ بارىسىندا ۇلتتىق موتيۆ، قالا تۇرعىندارى مەن قوناقتارىنا كوكتەمگى جاڭارۋ مەن بالعىندىقتى جەتكىزەتىن گۇل ينستاللياتسيالارى قولدانىلدى.
بەزەندىرۋدىڭ نەگىزگى تۇجىرىمداماسى - ۇزاق ءارى قاتتى قىستان كەيىن بايشەشەكتەي قۇلپىرعان گۇلدەنگەن قالانىڭ بەينەسىن جاساۋ، بۇل ءۇشىن كوكتەمگى گۇلدەردىڭ اۋقىمدى كومپوزيتسيالارى پايدالانىلادى.
