شىمكەنتتە جالعان 8 ميلليون دوللارمەن ۇستالعان نيگەريانىڭ ەكى ازاماتى سوتتالدى - فوتو
ولار وتكەن جىلدىڭ قازان ايىندا ۇستالعان بولاتىن. تەرگەۋ مالىمەتتەرى بويىنشا، 39 جاستاعى نۆوكە ەكەندەريچۋكۆۋ مەن 30 جاستاعى وبا جوزەفات شىمكەنتكە قازاقستانعا اعىلشىن تىلىنەن ساباق بەرۋ ءۇشىن كەلگەن-مىس. ولار پاتەر جالداپ تۇرعان. الايدا، ءدارىس بەرۋدىڭ ورنىنا جالعان شەتەلدىك ۆاليۋتانى وتكىزۋمەن اينالىسقان.
باستاپقىدا 16 مىڭ دوللاردى ۆاليۋتا ايىرباستاۋ پۋنكتىنە وتكىزۋگە تىرىسقان. كاسىپكەردى قوماقتى قاراجاتتى ارزان باعاعا ساتىپ الۋعا كوندىرىپ، ءوزارا ۋاعدالاسقان. دەسە دە، شەتەلدىكتەردىڭ مارتتىگىنە كۇدىكتەنگەن كاسىپكەر وبلىستىق مەملەكەتتىك كىرىستەر دەپارتامەنتىنە ارىزدانعان.
نيگەريالىقتاردىڭ پاتەرىن ءتىنتۋ كەزىندە جالعان بانكنوتتار تابىلدى. انىقتالعانداي، ولار كوك قاعازداردى ءوز ەلدەرىنەن بوياپ اكەلگەن. بارلىعى 8 ميلليون دوللار جالعان اقشانى وتكىزۋدى جوسپارلاعان.
اتالمىش فاكتى بويىنشا قىلمىستىق ءىس قوزعالىپ، شەتەلدىك ازاماتتار قاماۋعا الىنعان بولاتىن. بۇگىن ءال- فارابي اۋداندىق سوتىنىڭ سۋدياسى تالعات قاھاروۆ قوس كۇدىكتىنى كىنالى دەپ تاۋىپ، 5 جىلعا باس بوستاندىقتارىنان ايىردى. الايدا، ەلىمىزدە راقىمشىلىق زاڭىنىڭ قولدانىلۋىنا باينىستى جازالارىن وتەۋ مەرزىمدەرى 3 جىل 9 اي دەپ بەلگىلەندى.
