پروكۋرورلار الاياقتاردان الدانباۋدىڭ 8 ءتۇرلى امالىن اتادى

استانا. قازاقپارات - وڭتۇستىك قازاقستان وبلىسىنىڭ پروكۋراتۋراسى ءوزىنىڭ رەسمي سايتىندا الاياقتاردىڭ قۇربانىنا اينالماۋدىڭ امالدارىن ۇسىندى، دەپ حابارلايدى قازاقپارات.
None
None

سوڭعى كەزدەرى ەلىمىزدە الاياقتىق سارىنداعى وقيعالار تىم جيىلەپ بارادى. ءتارتىپ ساقشىلارى الاياقتىقتى جاساۋشىلاردىڭ كوبىسى ايەلدەر ەكەنىن ايتادى. اككىلەردىڭ قۇرىعىنا الدىمەن تۇسەتىندەردىڭ قاتارىن دا نازىك جاندىلار قۇرايدى. ولاردىڭ باسىم بولىگى الەۋمەتتىك جاعدايلاردى تۇزەپ بەرۋگە، اتاپ ايتقاندا، جۇمىسقا ورنالاستىرۋدان باستاپ، ءتىپتى مەملەكەتتىك جاردەماقىلاردى تاعايىنداۋعا كومەكتەسۋگە دە ۋادە ەتەدى. «جەڭىلدەتىلگەن نەسيە الىپ بەرەمىن» دەپ سازعا وتىرعىزىپ كەتەتىن «قامقور» الاياقتار دا جەتەرلىك.

جالپى، الاياقتاردىڭ ارباۋىنا ءتۇسىپ قالماۋدىڭ جولى قايسى؟

1. ءۇيدىڭ ەسىگىن بەيتانىس ادامدارعا اشپاۋ، ءتىپتى ولار ارنايى قىزمەت، پوليتسيا، ەمحانا، تۇرعىن-ءۇي كوممۋنالدىق شارۋاشىلىعى قىزمەتكەرلەرى دەپ تانىستىرسا دا، الدىمەن مىندەتتى تۇردە تەلەفون ارقىلى ولاردىڭ ءدال سول ورگانداردان كەلگەنىن مۇقيات انىقتاپ الىڭىز.

2. ەگەر سىزدەردى كوشەدە بەيتانىس ادامدار سوزگە تارتۋعا تىرىسسا، اسقان ساقتىق تانىتىڭىز. ولاردىڭ ۇسىنىستارىنا كەلىسپەڭىزدەر، ءوز ۇيلەرىڭىزگە ول كىسىنى ەش شاقىرماڭىزدار.

3. ءتىل، كوز تيۋدەن ارىلتىپ، بولاشاقتى بولجايمىن دەپ كەلگەن ادامدارمەن ارالاسپاۋعا تىرىسىڭىز، بۇل - سەنگىش ادامداردىڭ قاراجاتىن يەمدەنىپ كەتۋدىڭ جاقسى امالى.

4. ءسىزدىڭ تۋىسىڭىز نەمەسە تانىسىڭىز الدەبىر قيىندىققا تاپ بولدى جانە ونى الىپ شىعۋ ءۇشىن ءىرى سوما كەرەك دەگەن اقپاراتقا ەش سەنبەڭىز.

5. سىيلىق ويناتىلاتىن ويىندارعا، ءجۇز دەرتكە شيپا ءدارى-دارمەكتەردى، قۇرىلعىلار مەن ارزان زاتتاردى ساتىپ الۋعا كونبەڭىز.

6. ايىپپۇل تولەۋ جانە كوممۋنالدىق تولەم جاسار الدىندا تۇبىرتەكتى مۇقيات تەكسەرىڭىز.

7. بانك كارتوچكاسىن بۇعاتتاۋ تۋرالى اقپاراتتى تەكسەرگەن ابزال، ول ءۇشىن تەك بانك بولىمشەسىنە قوڭىراۋ شالۋ جەتكىلىكتى.

8. ەگەر ءسىزدى الدايتىنىن سەزسەڭىز، پوليتسياعا حابارلاسۋدان ۇيالماڭىز، - سىزگە مىندەتتى تۇردە كومەكتەسەدى.

قازاقستاندا الاياقتىق ءۇشىن قىلمىستىق جاۋاپكەرشىلىك بەلگىلەنگەن. قىلمىستىق كودەكستىڭ 190-بابىنا سايكەس وسى قىلمىس ءۇشىن ولار جاۋاپقا تارتىلادى. الاياقتىق ءۇشىن بەرىلەتىن ەڭ جوعارى جازا - باس بوستاندىعىنان 10 جىلعا دەيىن ايىرۋ. الاياقتىقتىڭ نەگىزگى ءپرينتسيپى - ءوزى قۇربان ەتىپ وتىرعان ادامدى الداۋ، سول ارقىلى وزىنە اقشا، مۇلىك، باسقاداي نارسەلەردىڭ قۇقىن ەرىكتى تۇردە بەرگىزۋ بولىپ تابىلادى.

اۆتور: جاسۇلان جولدىبايەۆ

سوڭعى جاڭالىقتار