يۋنەسكو تىزىمىنە ەنبەك جىبەك جولى بويىنداعى 8 نىسان قىزىلوردا وبلىسىندا ورنالاسقان

قىزىلوردا. قازاقپارات- كەشە  قىزىلوردادا يۋنەسكو-نىڭ دۇنيەجۇزىلىك مادەني مۇرا تىزىمىنە «جىبەك جولى: فەرعانا- سىرداريا ءدالىزى» سەريالىق ترانسشەكارالىق نوميناتسياسى بويىنشا نوميناتسيالىق قۇجاتتاما دايىنداۋ جونىندەگى ساراپتامالىق كەزدەسۋ ءوتتى.

بۇل تۋرالى قازاقپارات ءتىلشىسى حابارلادى. شاراعا وبلىس اكىمى قىرىمبەك كوشەربايەۆ، يۋنەسكو جانە يسەسكو ىستەرى جونىندەگى ق ر ۇلتتىق كوميسسياسىنىڭ باس حاتشىسى اسەل وتەگەنوۆا مەن دۇنيەجۇزىلىك مادەني مۇرا ورتالىعىنىڭ وكىلى، يۋنەسكو-نىڭ دۇنيەجۇزىلىك مادەني مۇرا ورتالىعىنىڭ ازيا-تىنىق مۇحيتى سەكتسياسىنىڭ باعدارلامالىق مامانى لين رولاند، سونداي-اق قىتاي، قىرعىزستان، وزبەكستان، تاجىكستانداعى يۋنەسكو-نىڭ رەسمي وكىلدەرى، وبلىس اكىمدىگىنىڭ عىلىمي-ادىستەمەلىك كەڭەس مۇشەلەرى، قورقىت اتا اتىنداعى  قىزىلوردا مەملەكەتتىك ۋنيۆەرسيتەتىنىڭ عالىمدارى قاتىستى.

قىرىمبەك كوشەربايەۆ ءوز سوزىندە قازاقستان بويىنشا يۋنەسكو-نىڭ الدىن الا تىزىمىنە ەنگەن جىبەك جولىنىڭ سىرداريا اۋماعىنداعى 16 وبەكتىنىڭ 8 ءى قىزىلوردا ايماعىنا تيەسىلى ەكەندىگىن اتاپ ءوتتى. ولار - سىعاناق، جانقالا (جەنت)، جانكەنت، كەسكەن-كۇيىك، شىرىك-رابات، ءبابىش موللا، جەتىاسار وازيسى ەسكەرتكىشى جانە بالاندى قونىسى. «ءبىزدىڭ وبلىستا قۇرىلعان تاريحي-مادەني مۇرالاردى قورعاۋ جانە پايدالانۋ جونىندەگى عىلىمي-ادىستەمەلىك كەڭەس تاريحي مۇرالاردى قورعاۋ جانە پايدالانۋ ماسەلەلەرى بويىنشا عىلىمي-زەرتتەۋ جۇمىس ناتيجەلەرىنىڭ عىلىمي ماڭىزدىلىعىن ارتتىرۋ بويىنشا جوبالاردى ۇيلەستىرەدى جانە جۇزەگە اسىرادى.

يۋنەسكو-نىڭ بۇكىل الەمدىك مۇرالار تىزىمىنە جوعارىدا اتالعان  قىزىلوردا وبلىسى اۋماعىنداعى ەسكەرتكىشتەردى ەنگىزۋ ءۇشىن 2014-جىلدان باستاپ وبلىستىق بيۋدجەتتەن قارجى بولىنۋدە»، - دەدى ايماق باسشىسى.

ساراپتامالىق كەزدەسۋگە قاتىسۋشىلار الەم مادەنيەتى ءۇشىن سىرداريا-فەرعانا ءدالىزىنىڭ ماڭىزدىلىعىن تالقىلاپ، بۇكىل الەمدىك مۇرالار ورتالىعىنا نوميناتسيالىق قۇجاتتاردى جەتكىزۋ كۇنىن بەلگىلەدى.

اۆتور: ەلۋباي اۋەزوۆ