استاناعا بيىل 8 ميلليونداي گۇل ەگىلەدى

استانا. قازاقپارات - بيىل 162 288 شارشى مەتر جەرگە گۇل وتىرعىزۋ جوسپارلانعان، سونىڭ ىشىندە ءبىر جانە كوپ جىلدىق وسىمدىكتەر دە بار، 25 مىڭعا جۋىق فرانسۋز راۋشانگۇلىنىڭ كوشەتى ەگىلەدى.

بۇل تۋرالى ەلوردانىڭ رەسمي سايتى حابارلايدى.

ەلوردانىڭ ساۋلەت- پەيزاجدىق كەلبەتىن قۇرۋدا گۇلزارلاردى بەزەندىرۋ دە ماڭىزدى. گۇل وتىرعىزۋ جۇمىستارى مامىر ايىندا باستالعان. جازدا 147 مىڭ شارشى مەتردەن استام جەرگە گۇلزار جاسالادى، سونىڭ ىشىندە «الماتى» اۋدانىندا - 50436 شارشى م، «ەسىل» اۋدانىندا - 80 999 شارشى م، «سارى ارقا» اۋدانىندا - 16 155 شارشى م.

گۇلباقتارىن، اسپالى جانە ستاتسيونارلىق قۇمىرالاردى، كاشپولاردى بەزەندىرۋ ءۇشىن 7 ميلليون 700 مىڭنان استام ءبىر جىلدىق گۇل وتىرعىزىلادى.

ساپالى گۇلدەرمەن قامتاماسىز ەتۋ ءۇشىن «استانا- زەلەنستروي» اق ەكى جىلىجايدا ءبىر جىلدىق گۇلدەر مەن توسەلمەلى وسىمدىكتەر كوشەتتەرىن وسىرەدى. ونىڭ ۇستىنە، № 1 -جىلىجاي شارۋاشىلىعىندا كىلەم ءتارىزدى وسىمدىكتەردىڭ ءتۇر-ءتۇرى بار. اتاپ ايتقاندا، التەرنانتەردىڭ ەكى ءتۇرى، سەدۋمنىڭ توعىز ءتۇرى، سينەراريي، ەحيەۆەريا، قامىس، يرەزينە، سانتولينا، سەنەتسيو، بوزوت جانە ت. ب. ءپىل، كەرىك، تاسباقا، حوككەيشىلەر، «تابيعاتتى ايالايىق» كومپوزيتسياسى، جەر شارى، تۇيەلەر، قۇمىرالار، فۋتبول دوبى جانە ت. ب. تىك جاسىل فيگۋرالاردى ناق وسى گۇلدەرمەن بەزەندىرىلگەن. جالپى، 19 ساندىك فيگۋراعا 643 مىڭعا جۋىق توسەلمەلى كىلەم تارىزدەس وسىمدىك وسىرىلگەن.