16:17, 21 - جەلتوقسان 2015 | GMT +5
ف ي ف ا پرەزيدەنتى مەن ۋ ە ف ا باسشىسى فۋتبولدان 8 جىلعا شەتتەتىلدى
استانا. قازاقپارات - ف ي ف ا پرەزيدەنتى زەپپ بلاتتەر مەن ۋ ە ف ا باسشىسى ميشەل پلاتيني ءارقايسىسى 8 جىلعا فۋتبولمەن شۇعىلدانۋدان شەتتەتىلدى، دەپ حابارلادى AFP.
مۇنداي شەشىمدى ف ي ف ا- نىڭ ەتيكا جونىندەگى كوميسسياسى قابىلدادى.
قازان ايىنىڭ باسىندا اتالعان ەكەۋى دە سىبايلاس جەمقورلىققا جول بەردى دەگەن كۇدىكپەن 90 كۇنگە قىزمەتتەرىنەن شەتتەتىلگەن بولاتىن. قاراشا ايىنىڭ سوڭىندا بلاتتەر مەن پلاتينيگە قاتىستى تەرگەۋ باستالعان. ەكەۋى دە ءومىر بويىنا ديسكۆاليفيكاتسيالانۋى مۇمكىن ەكەندىگى حابارلانعان.
ەسكە سالساق، ف ي ف ا- نىڭ جاڭا باسشىسىن سايلاۋ 2016 -جىلعى 26 -اقپاندا وتەدى. كوميسسيا شەشىمى پلاتينيدىڭ بۇل سايلاۋعا قاتىسا المايتىنىن بىلدىرەدى.
