قازاقستاندىقتار سەنەگالدىڭ 8 اۋىلىن اۋىزسۋمەن قامتاماسىز ەتتى
«استانا قالاسىنىڭ قازاق-تۇرىك ليتسەيىنىڭ تۇلەكتەرى سەنەگالدا 8 اۋىلدى اۋىزسۋمەن قامتاماسىز ەتەتىن قۇدىق قازىپ، ورناتۋ جۇمىستارىنا دەمەۋشىلىك جاسادى»، دەپ جازدى فەيسبۋكتە ق ت ل تۇلەگى اسحات بوبەي.
ونىڭ ايتۋىنشا، سەنەگالدا سۋدىڭ جەتىسپەۋشىلىگى وتكىر ماسەلە بولعاندىقتان، وسى ەلگە تاڭداۋ تۇسكەن.
«كەيبىرى «نەگە افيركا؟» دەگەن ويعا قالۋى مۇمكىن. بىزدە ءدال مۇنداي پروبلەما جوق. كەڭەس وداعى كەزىندە بارلىق ەلدى مەكەندەرگە سۋ تارتىلعان، ال ولاردا سۋ تاپشىلىعى وتكىر ماسەلەگە اينالعان. بۇل قايىرىمدى ءىس قۇرلىق تۇرعىندارىنىڭ جۇرەگىنە ولارعا بەي-جاي قارامايتىن ادامدار دا الەمدە بار ەكەن دەگەن جىلىلىق ۇيالاتارى ءسوزسىز»، - دەدى ول.
ەسكە سالساق، قازاقستاندا العاشقى قازاق-تۇرىك ليتسەيى 1992-جىلى الماتى، كوكشەتاۋ، كەنتاۋ قالالارىندا پايدا بولدى.
دارىندى بالالارعا ارنالعان استانا قازاق-تۇرىك ليتسەيى 2014-جىلى 20 جىلدىعىن اتاپ ءوتتى. دارىندى بالالار ليتسەيگە كوكتەمدە 6- سىنىپتى اياقتاعاننان كەيىن لوگيكا، ماتەماتيكا، قازاق ءتىلى پاندەرى بويىنشا تەستىلەۋ ناتيجەسى بويىنشا تۇسەدى. ليتسەيدە ماتەماتيكا، بيولوگيا، فيزيكا، گەوگرافيا، حيميا تەرەڭدەتىلىپ وقىتىلادى. ساباق اعىلشىن تىلىندە وتەدى. بۇدان باسقا، ولار تۇرىك، ورىس تىلدەرىن زەردەلەيدى. گۋمانيتارلىق پاندەر مەملەكەتتىك تىلدە وتەدى.