قازاقستاننىڭ 8 تاريحي نىسانى يۋنەسكو- نىڭ الەمدىك مۇرالارى تىزىمىنە ەنگىزىلدى
بۇل تۋرالى يۋنەسكو ىستەرى جونىندەگى ۇلتتىق كوميسسيالاردىڭ ايماقارالىق 1- كەڭەسى بارىسىندا قازاقستاننىڭ ۇلتتىق كوميسسياسىنىڭ ەكس- ءتوراعاسى، ەلوردا اكىمى يمانعالي تاسماعامبەتوۆ ءمالىم ەتتى.
«تاباندى جۇمىستارىمىزدىڭ نەگىزىندە يۋنەسكو- نىڭ الەمدىك مۇرالار تىزىمىنە ەلىمىزدىڭ ءۇش تاريحي ەسكەرتكىشى ەنگىزىلگەن بولاتىن. اتاپ ايتقاندا، قوجا احمەت ياساۋي كەسەنەسى، تامعالى پەتروگليف ارحەولوگيالىق تاس كەشەنى، سارى ارقا جانە سولتۇستىك قازاقستان كولدەرى مەن جازىقتارى، قورعالجىن جانە ناۋرىزىم قورىقتارى. بيىل ولاردىڭ قاتارىن تاعى دا 8 تاريحي نىسانى (الماتى وبلىسىنداعى قايالىق، قارامەرگەن، تالعار جانە جامبىل وبلىسىنداعى اقتوبە ستەپنينسكوە، اقىرتاس، قۇلان، قوستوبە، ورنەك) تولىقتىرىپ وتىر.
ەلىمىزدەگى وسىنداي جادىگەرلەردىڭ الەمدىك مادەني قۇندىلىقتار قاتارىندا دۇنيەجۇزىلىك مۇرالار تىزىمىنە ەنۋى تۇتاس حالقىمىزدىڭ ارمان- تىلەگى مەن رياسىز پەيىلىنىڭ كورسەتكىشى دەپ بىلەمىن» ، - دەدى شارا بارىسىندا ي. تاسماعامبەتوۆ.
سونىمەن بىرگە، ەلوردا اكىمى ادامزاتقا ورتاق رۋحانياتتى بارىنشا جاقىنداستىرىپ، الەمدىك تۇلعالار ەسىمىن تانىستىرۋدا «اتاۋلى داتالار كۇنتىزبەسى» جوباسىنىڭ ايرىقشا ورىن الاتىنىن اتاپ ءوتتى. ونىڭ ايتۋىنشا، يۋنەسكو كۇنتىزبەسىنە قازاقستاننىڭ ءتول تاريحىنا، ۇلتتتىق تۇلعالارىنا قاتىستى مەرەيتويلىق داتالار ەنگىزىلگەن. «بۇل ارينە، ءبىرىنشى كەزەكتە الەم ەلدەرىنە ۇلتتىق ادەبيەتىمىزدەگى جاۋھار تۋىندىلارمەن سۋسىنداۋعا مۇمكىندىك بەرىپ وتىر. وسى ارقىلى جاھان جۇرتشىلىعى قازاق حالقىنىڭ مادەنيەتىمەن، تاريحىمەن تانىسۋدا» ، - دەدى ي. تاسماعامبەتوۆ.
ەستەرىڭىزگە سالا كەتەيىك، استانادا يۋنەسكو ىستەرى جونىندەگى ۇلتتىق كوميسسيالاردىڭ ايماق ارالىق 1- كەڭەسى وتۋدە. شاراعا يۋنەسكو- نىڭ بارلىق بەس وڭىرلىك توپتارىنان، اتاپ ايتقاندا، اراب مەملەكەتتەرى، ازيا جانە تىنىق مۇحيتى، ەۋروپا جانە سولتۇستىك امەريكا، لاتىن امەريكاسى مەن كاريب باسسەينى ەلدەرىنەن 125 مەملەكەتتىڭ ۇلتتىق كوميسسيالارىنىڭ وكىلدەرى قاتىسۋدا.
اۆتور: قانات مامەتقازى ۇلى
