قازاقستانداعى 8 تاريحي جادىگەر يۋنەسكو-نىڭ بۇكىل الەمدىك مۇرالار تىزىمىنە ەندى

استانا. قازاقپارات - بۇل كۇندەرى كاتار مەملەكەتىنىڭ استاناسى دوحا قالاسىندا شەيح ءال-ماياسسى بينت حاماد بين حاليف ءال-تانيزانىڭ ءتوراعالىق ەتۋىمەن يۋنەسكو بۇكىل الەمدىك مۇرا كوميتەتىنىڭ (ب م ك) 38-سەسسياسى ءوتىپ جاتىر.
None
None

سەسسيانىڭ ەڭ ماڭىزدى قورىتىندىلارىنىڭ ءبىرى يۋنەسكو-نىڭ بۇكىل الەمدىك مۇرا تىزىمىنە قازاقستان، قىتاي جانە قىرعىزستان تەرريتوريالارى ارقىلى وتكەن «جىبەك جولى: باستاپقى بولىك جانە تيانشان دالىزىندەگى مارشرۋتتار جەلىسى» اتتى ترانسشەكارالىق سەريالىق اتالىمداعى ءبىرىنشى بولىگىنىڭ ەنۋى بولدى.

جىبەك جولىنىڭ بۇل بولىگىندە قازاقستاننىڭ 8 تاريحي جادىگەرى بار، ولار: الماتى وبلىسىنداعى قايالىق، قارامەرگەن جانە تالعار، ال جامبىل وبىلىسىنداعى اقتوبە ستەپينسكوە، اقىرتاس، قۇلان، قوستوبە جانە ورنەك.

اتالعان حالىقارالىق فورۋمعا قازاقستان تاراپىنان يۋنەسكو ىستەرى بويىنشا ق ر ۇلتتىق كوميسسياسىنىڭ ساراپشىلارى، يۋنەسكو جانىنداعى ق ر تۇراقتى وكىلدىگىنىڭ، ق ر س ءى م جانە 2014 - جىلى كوكتەمدە قۇرىلعان بۇكىل الەمدىك مۇرا ۇلتتىق كوميتەتىنىڭ وكىلدەرىنەن قۇرالعان دەلەگاتسيا قاتىسۋدا.

ايتا كەتۋ كەرەك، ب م ك-نىڭ قازىرگى سەسسياسىندا قازاقستان 2013 - جىلعى قاراشادا باسەكەلەستىك سايلاۋ قورىتىندىسى بويىنشا يۋنەسكو-نىڭ اتالعان ورگانىنا سايلانعان 21 مۇشە-مەملەكەتتىڭ ءبىرى رەتىندە قاتىسىپ وتىر.

قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ باس حاتشىسى اسەل وتەگەنوۆانىڭ ايتۋىنشا، ۇلى جىبەك جولى ادامزات بالاسى تاريحى مەن وركەنيەت دامۋىنداعى ەڭ ماڭىزدى وقيعالاردىڭ ءبىرى جانە ول باتىس پەن شىعىستى ساۋدا-ساتتىق، مادەني تۇرعىدا بايلانىستىرعان التىن كوپىر.

«جىبەك جولىنىڭ» ەڭ ۇزاق بولىگى ورتالىق ازيا جەرى ارقىلى وتەتى جانە تاعدىردىڭ جازۋىمەن ەۋرازيا كىندىگىندە ورنالاسقان قازاقستان جەرى ءتۇرلى مادەنيەتتەردىڭ، ەۋروپالىق جانە ازيالىق، باتىستىق جانە شىعىستىق مادەنيەتتەردىڭ اراسىنداعى التىن كوپىر ىسپەتتەس بولدى»، - دەدى ءا. وتەگەنوۆا.

ونىڭ ايتۋىنشا، بۇگىنگى تۋريزم، ەكونوميكالىق جانە الەۋمەتىتك ينتەگراتسيا زامانىندا «جىبەك جولى» بۇرىنعىدان دا ۇلكەن ماڭىزدىلىققا يە بولىپ وتىر. «اتالعان ترانسشەكارالىق جول بولىگىن يۋنەسكو تىزىمىنە ەنگىزۋ جىبەك جولىن قايتا جانداندىرۋعا ۇلكەن ىقپالىن تيگىزبەك. ءبىز بۇل وقيعانىڭ 2013-2022 - جىلدار ارالىعىن ءبىزدىڭ ەلىمىزدىڭ باستاماسى بويىنشا يۋنەسكو مەن ب ۇ ۇ «مادەنيەتتەر جاقىنداسۋىنىڭ حالىقارالىق دەكاداسى» دەپ جاريالاعان تاريحي كەزەڭگە تۇسپا-تۇس كەلۋىن دە جاقسى ىرىمعا بالاپ وتىرمىز»، - دەدى ءا. وتەگەنوۆا.

ونىڭ ايتۋىنشا، قازاقستان ءوز كەزەگىندە ەل اۋماعىنداعى تاريحي جادىگەرلەردى قورعاۋعا الىپ، ودان ءارى «جىبەك جولى» تۇجىرىمداماسىن يۋنەسكو-نىڭ ءتۇرلى جوبالارى مەن باعدارلامالارى ارقىلى جەتىلدىرە ءتۇسۋ قاجەت.

ايتا كەتەيىك، بۇكىلالەمدىك مۇرا كوميتەتى مادەني، تابيعي نەمەسە ارالاس مۇرالاردى يۋنەسكو-نىڭ بۇكىل الەمدىك مۇرالار تىزىمىنە ەنگىزۋ نەمەسە شىعارۋ شارالارىن شەشەدى، سونداي-اق قاتىسۋشى مەملەكەتتەرگە جادىگەرلەردى ساقتاپ-قورعاۋ بويىنشا ءتۇرلى نۇسقاۋلىقتار بەرەدى.

قازىرگى كەزدە اتالعان تىزىمدە قازاقستانداعى 3 نىسان: قوجا احمەت ياسساۋي كەسەنەسى، تامعالي پەتروگليفتەرى جانە سولتۇستىك قازاقستاننىڭ دارقان دالاسى مەن سالقار كولدەرى تۇنعان سارى ارقا جاتادى.

اۆتور: ءابۋ-اسقار مەكەش ۇلى

سوڭعى جاڭالىقتار