شىمكەنتتە 8 مىڭ ورىندىق جاڭا مەشىت بوي كوتەرەدى

استانا. قازاقپارات - بۇگىن وبلىس اكىمى ا. مىرزاحمەتوۆ پەن ءوڭىردىڭ زيالى قاۋىم وكىلدەرى شىمكەنت قالاسىنىڭ جاڭا اكىمشىلىك-ىسكەرلىك ورتالىعىندا بوي كوتەرەتىن ەڭسەلى مەشىتتىڭ كاپسۋلاسىن سالۋ راسىمىنە قاتىستى.

بارشا مۇسىلمان ءۇشىن قاسيەتتى ورازا ايىنىڭ الدىندا قۇرىلىسى باستالاتىن نىسان 2016 - جىلى قاسيەتتى رامازان ايىندا ەل يگىلىگىنە تاپسىرىلماق. بۇل تۋرالى و ق و اكىمى اپپاراتىنىڭ باسپا ءسوز قىزمەتى حابارلادى.

مەشىتتە ءبىر مەزەتتە سەگىز مىڭ ادام قۇلشىلىق جاساي الادى. مۇندا اۆتوكولىك قويۋعا ارنالعان كوپ دەڭگەيلى پاركينگ، جەدەلساتى، ەسكالاتور، اۋا اعىمىن رەتتەۋگە ارنالعان زاماناۋي جۇيەلەر ورناتىلادى. سونىمەن قاتار، كۇننەن قۋات الاتىن قۇرىلعىلار قويىلادى.

مۇنداعى ايەلدەرگە ارنالعان ورىنعا ءبىر مەزەتتە مىڭ ادام سىيادى. عيماراتتىڭ ەدەنىن اۋا ارقىلى جىلىتىپ، سالقىنداتاتىن زاماناۋي جۇيە ورناتىلادى.

ىشتەگى ۆەنتيلياتسيا جۇيەسى ق. ا. ياساۋي كەسەنەسىنىڭ تەحنولوگياسى بويىنشا شەشىلەدى. مەشىت الدىنداعى بەس مىڭنان استام ادامعا ەسەپتەلىنگەن الاڭدا جاماعاتتى كۇننەن، جاۋىن- شاشىننان قورعاۋ ءۇشىن شاتىر بولىپ اشىلاتىن جۇيە قويىلادى.

مەشىتتە مۇسىلماندىق جورالاردى جاسايتىن ورىندار، كونگرەسس- حولل، تاماقتانۋعا ارنالعان زال، نەكە سارايى، يسلامدىق ءبىلىم بەرۋ ورتالىعى، مەدرەسە، كىتاپحانا، اسحانا، فيتنەس زالدارى، اكىمشىلىك بولمەلەر سالىنادى. كەشەندە ءبىلىم الۋشىلارعا ارنالعان تۇرعىن جاي مەن قوناقتارعا ارنالعان اپارتامەنتتەر بولادى.

اۆتور: رۋسلان عابباسوۆ