سەناتورلىقتان 89 ادام ءۇمىتتى
«سايلاۋ زاڭناماسى نورمالارى اياسىندا ورتالىق سايلاۋ كوميسسياسى ق ر پارلامەنتى سەناتىنىڭ دەپۋتاتتارىن سايلاۋدى ۇيىمداستىرۋ جانە وتكىزۋگە باسشىلىق ەتەدى. ق ر پارلامەنت سەناتى دەپۋتاتتارىن كەزەكتى سايلاۋىن وتكىزۋ ءىس-شارالارىنىڭ كۇنتىزبەلىك جوسپارىنا سايكەس، 28- مامىردا وسى سايلاۋدىڭ ءبىرىنشى كەزەڭى - كانديداتتاردى ۇسىنۋ رەسمي تۇردە اياقتالدى. وبلىستاردا، استانا مەن الماتى قالالارىندا دەپۋتاتتىققا كانديداتتاردى ۇسىنۋ وتە بەلسەندى جۇرگىزىلدى. بارلىق اۋماقتىق سايلاۋ كوميسسيالارى ورتالىق سايلاۋ كوميسسياسىنا الداعى سايلاۋعا كانديداتتاردى ۇسىنۋدىڭ سوڭعى قورىتىندىلارى تۋرالى اقپاراتتى ۇسىنعانىن اتاپ وتكىم كەلەدى»، - دەدى ب. يماشەۆ.
كەلەسى كەزەكتە ءسوز العان ق ر و س ك سايلاۋ پروتسەسىن ۇيىمداستىرۋ ءبولىمىنىڭ مەڭگەرۋشىسى ماقساتحان اناپيننىڭ ايتۋىنشا، 28- ساۋىردەن 28- مامىرعا دەيىنگى كەزەڭدە رەسپۋبليكا بويىنشا پارلامەنت سەناتىنىڭ دەپۋتاتتىعىنا بارلىعى 89 كانديدات ۇسىنىلدى. سالىستىرىپ ايتار بولساق، 2014-جىلى وتكىزىلگەن سەنات سايلاۋىنا 88 كانديدات، ال 2011-جىلى 96 كانديدات ۇسىنىلعان ەكەن.
وسىلايشا، پارلامەنتتىڭ جوعارى پالاتاسىنىڭ دەپۋتاتتارىن سايلاۋ جونىندەگى سوڭعى ءۇش سايلاۋ ناۋقانىندا ۇسىنۋ قورىتىندىلارى بويىنشا ءبىر سەناتور مانداتىنا ورتاشا العاندا 5 ۇمىتكەردەن كەلەدى. بيىل كانديداتتاردىڭ كوبى استانا قالاسىندا ۇسىنىلدى - 9 ادام، ەڭ ازى شىعىس قازاقستان وبلىسىندا - 4 ادام. سەناتقا قازىرگى سايلاۋ بارىسىندا ءوزىن-ءوزى ۇسىنۋ قۇقىعىن پايدالانعان كانديداتتار سانى - 82.
بۇل رەتتە ءماسليحاتتار 7 كانديداتتى ۇسىندى. «سونداي-اق وتكەن سايلاۋ ناۋقاندارىمەن سالىستىرعاندا ايەلدەردىڭ بەلسەندىلىگى 2,6 ەسە ءوستى. ۇسىنىلعان كانديداتتاردىڭ ىشىندە 13 ايەل. ال 2014-جىلى 5 ايەل، 2011-جىلى 6 ايەل ۇسىنىلعان ەدى. ونىڭ ىشىندە استانا جانە الماتى قالالارىندا 7 ايەل ۇسىنىلىپ وتىر. كانديداتتاردىڭ ورتاشا جاسى 51,9 جاستى قۇرايدى. ەڭ جاس كانديدات 30 جاستا، ۇمىتكەرلەردىڭ ىشىندەگى ەڭ ۇلكەنى 68 جاستا»، - دەدى ول.
ونىڭ سوزىنە قاراعاندا، كانديداتتاردىڭ 26 سى ينجەنەر، 21 ءى ەكونوميست، 10 ى وقىتۋشى، 10 ى زاڭگەر، 9 ى اگرارلىق سالانىڭ وكىلدەرى، 5 ەۋى دارىگەر، 2 ەۋى ساياساتتانۋشى جانە 6 اۋى باسقا ماماندىق يەلەرى.
«ءوز كانديداتۋرالارىن قىزمەتتەگى 4 سەناتور ۇسىندى. ۇسىنىلعانداردىڭ ىشىندە 5 ەۋى ءماسليحاتتار دەپۋتاتتارى، 35 ءى - كوممەرتسيالىق قۇرىلىمداردىڭ قىزمەتكەرلەرى، 13 ءى - مەملەكەتتىك ۇيىمدار، كاسىپورىندار مەن مەكەمەلەردىڭ قىزمەتكەرلەرى، 23 ءى - مەملەكەتتىك قىزمەتشىلەر جانە 7 ەۋى - قوعامدىق ۇيىمداردىڭ وكىلدەرى»، - دەدى م. اناپين.
ايتا كەتەرلىگى، قازىرگى ۋاقىتتا سەنات دەپۋتاتتىعىنا كانديداتتاردى تىركەۋ ءراسىمى جالعاسۋدا. ول 7- ماۋسىمعا دەيىن جالعاسادى. سايلاۋ تۋرالى زاڭناماعا سايكەس سايلاۋ كوميسسيالارى مەملەكەتتىك ورگاندارمەن بىرلەسە وتىرىپ، ۇسىنىلعان قۇجاتتاردىڭ دۇرىستىعىن تەكسەرۋ بويىنشا جۇمىس جۇرگىزۋدە. 28- مامىرداعى جاعداي بويىنشا وبلىستىق، استانا جانە الماتى قالالىق سايلاۋ كوميسسيالارى سەنات دەپۋتاتتىعىنا 62 كانديداتتى تىركەدى.
اۆتور: مارلان جيەمباي
