وسكار سىيلىعىن تاپسىرۋ راسىمىندە 89 جىلدىق تاريحتا بولماعان وقيعا ورىن الدى - كەسكىن
ۇيىمداستىرۋشىلار «ەڭ ۇزدىك فيلم» جازىلعان كونۆەرتتى شاتاستىرىپ العان. وتكەن عاسىردىڭ تانىمال اكتەرى، كينورەجيسسەر جانە پروديۋسەر ۋوررەن بيتتيگە «ەڭ ۇزدىك فيلم» اتالىمى بويىنشا جەڭىمپاز فيلمدى جاريالاۋ مارتەبەسى بەرىلدى.
ول كونۆەرتتى اشىپ، 2017 -جىلدىڭ ۇزدىك فيلمى «لا- لا- لەند» ەكەنىن مالىمدەدى. جەتىنشى وسكاردى يەلەنگەن شىعارماشىلىق توپ ساحناعا شىعىپ، كورەرمەنگە العىس ءبىلدىرىپ، قۇتتىقتاۋ لەبىزدەرىن ايتا باستادى. سول ساتتە ۇيىمداستىرۋشىلاردان قاتەلىك كەتكەنى انىقتالىپ، شىن مانىندە «اي ساۋلەسى» فيلمىنىڭ جەڭىسكە جەتكەنى بەلگىلى بولدى. كەش جۇرگىزۋشىسى دجيممي كيممەل «لا- لا- لەند» فيلمىنىڭ پروديۋسەرىنەن وسكار مۇسىنشەسىن جۇلىپ الىپ، «اي ساۋلەسى» فيلمىنىڭ اۆتورلارىنا بەردى.
«اي ساۋلەسى» فيلمى جەڭىسكە جەتەدى دەپ ەشكىم كۇتپەسە كەرەك. قالىڭ كورەرمەن جەڭىمپازداردىڭ سوزىنە قۇلاق اسپاي، ۋىلدەي باستادى. كەش اقساقالى ۋوررەن بيتتي «اي ساۋلەسى» فيلمىنىڭ جەڭىمپاز ەكەنىن راستاپ، جۇرتشىلىقتى سابىرعا شاقىردى.
مۇنداي كەلەڭسىزدىك «وسكاردىڭ» 89 جىلدىق تاريحىندا بولماعانىن اتاپ وتكەن ءجون. «اي ساۋلەسى» - 2016 -جىلى تۇسىرىلگەن امەريكالىق درامالىق فيلم. وندا كەدەيلىككە تاپ بولعان، اناسى ەسىرتكى قۇرساۋىنا شىرمالعان، ءوزىنىڭ جىنىستىق باعدارى وزگەشە قارا ءناسىلدى جىگىتتىڭ وقيعاسى باياندالادى. «ۇزدىك فيلمنەن» بولەك بۇل تۋىندى «ەكىنشى پلانداعى ۇزدىك ەر ادام ءرولى» جانە «ۇزدىك بەيىمدەلگەن سەناري» اتالىمى بويىنشا ەكى وسكار جۇلدەسىن يەلەندى.
اۆتور: ايجان سەرىكجان قىزى
