قاڭتار تراگەدياسى: 893 كۇدىكتىنىڭ 792 سى قاماۋعا الىنعان
«قاڭتارداعى تارتىپسىزدىكتەرگە بايلانىستى مينيسترلىككە ازاماتتاردى قاماۋ ورىندارىنا زاڭسىز جەتكىزۋ، ۇستاۋ، جاۋاپكەرشىلىككە تارتۋ تۋرالى كوپتەگەن شاعىم ءتۇستى. ءاربىر وسىنداي فاكتى بويىنشا، شاعىم مەن جاريالانىم بويىنشا تىڭعىلىقتى تەكسەرۋ جۇرگىزىلەدى. ەگەر ول مالىمەت راستالسا، دەرەۋ شارا قولدانىلادى»، - دەدى ءى ءى م وكىلى.
ۆەدومستۆونىڭ ءبىرىنشى ۆيتسە-ءمينيسترى قاڭتار وقيعاسى بويىنشا ۇستالعانداردىڭ ءىسى ارنايى پروكۋرورلاردىڭ باقىلاۋىندا ەكەنىن ەسكە سالدى.
«مەملەكەت باسشىسىنىڭ تاپسىرماسى بويىنشا تەرروريستىك اكتىلەردىڭ، جاپپاي تارتىپسىزدىكتەردىڭ سەبەپتەرى مەن ۇيىمداستىرۋشىلارىن انىقتاۋ جۇمىستارى باس پروكۋراتۋراعا جۇكتەلگەنىن ەستەرىڭىزگە سالعىم كەلەدى. وسىعان بايلانىستى اتالمىش ساناتتاعى جانە وسى وقيعالارمەن بايلانىستى ىستەردىڭ ءبارى ارنايى پروكۋرورلار باسقاراتىن ۆەدومستۆوارالىق تەرگەۋ توبىنا بەرىلدى»، - دەدى ول.
ايتۋىنشا، قازىر ىشكى ىستەر ورگاندارى قاڭتار وقيعاسىنا قاتىسى بار دەگەن 792 ادامدى قاماۋعا العان.
«قازىرگى تاڭدا ىشكى ىستەر ورگاندارىندا 2,5 مىڭنان استام قىلمىستىق ءىس تەرگەلىپ جاتىر. ونىڭ نەگىزگى بولىگى توناۋ مەن ۇرلىققا قاتىستى. قىلمىس جاسادى دەگەن كۇدىكپەن ۋاقىتشا ۇستاۋ يزولياتورىنا 893 ادام جەتكىزىلدى. سونىڭ 792 سى قاماۋعا الىندى. ۇستالعانداردىڭ كىناسى قولدى بولعان، زاقىم كەلگەن مۇلىك تۇرىندەگى تاركىلەنگەن زاتتاي ايعاقتاردىڭ، ۆيدەو، فوتو ماتەريالداردىڭ جانە تەرگەۋ ورگاندارىنىڭ باسقا دا پروتسەسسۋالدىق شارالارىنىڭ كومەگىمەن دالەلدەنىپ جاتىر»، - دەگەن ءى ءى م وكىلى ىستەردىڭ ءبارى قىلمىستىق پروتسەستىڭ ءۇش بۋىندى مودەلى اياسىندا ىسكە اسىپ جاتقانىن اتادى.
اۆتور: ەسىمجان ناقتىباي
