كانادا 890 ادام مايمىل شەشەگىن جۇقتىرعانىن راستادى

وتتاۆا. قازاقپارات - كانادا قوعامدىق دەنساۋلىق ساقتاۋ اگەنتتىگى سارسەنبىدەگى جاعداي بويىنشا ەلدە 890 ادام مايمىل شەشەگىن جۇقتىرعانىن راستادى، دەپ حابارلايدى قازاقپارات NEWS CN- گە سىلتەمە جاساپ.

ۆيرۋستى جۇقتىرعاندار ونتاريو پروۆينتسياسىندا – 423، كۆەبەكتە – 373، بريتاندىق كولۋمبيادا – 78، البەرتتە – 13، ساسكاچيەۆاندا - 2 جانە يۋكوندا 1 تىركەلدى. كانادا ۇلتتىق ميكروبيولوگيالىق زەرتحاناسى مايمىل شەشەگىن تۋدىراتىن ۆيرۋسقا دياگنوستيكالىق تەست جۇرگىزەدى. سونىمەن قاتار زەرتحانا گەنوم تىزبەگىن انىقتاپ، مايمىل شەشەگىنىڭ كانادالىق ۇلگىلەرىنە كەڭەيتىلگەن تالداۋ جاسايدى.

كانادا ۇكىمەتى «Imvamune» ۆاكسيناسىنىڭ 70 مىڭنان استام دوزاسىن ساتىپ الدى جانە قوعامدىق دەنساۋلىق ساقتاۋ سالاسىنداعى ۆەدومستۆولىق باعىنىستى ۇيىمدارمەن بەلسەندى ىنتىماقتاستىقتى جالعاستىرۋدا. دۇنيەجۇزىلىك دەنساۋلىق ساقتاۋ ۇيىمى مايمىل شەشەگىنىڭ ءورشۋىن حالىقارالىق دەنساۋلىق ساقتاۋ سالاسىنداعى توتەنشە جاعداي دەپ جاريالادى.

اۆتور اقبوپە ءابدراسۋل