استانا اكىمدىگى العاشقى 88 جەر تەلىمىن ساتىلىمعا شىعارادى
جيىن بارىسىندا قالانىڭ تۇيتكىلدى ماسەلەلەرى قاراستىرىلدى، اتاپ ايتقاندا، «ءبىز تازا قالانى قولدايمىز!» ەكولوگيالىق ايلىعىن وتكىزۋ مەن الداعى ماڭىزدى وقيعالارعا دايىندىق بارىسى ءسوز بولدى.
كەڭەس بارىسىندا اكىم شاعىن جانە ورتا بيزنەستى دامىتۋ ءۇشىن جەر تەلىمدەرىن ۇسىنۋدى ۇيىمداستىرۋ جانە بۇل جۇمىستىڭ تازالىعى ماسەلەسىنە توقتالىپ ءوتتى، دەپ حابارلايدى استانا قالاسى اكىمىنىڭ باسپا ءسوز قىزمەتىنەن.
- ءبىز ءباسساۋداعا قويىلاتىن العاشقى 88 جەر تەلىمىن انىقتاپ قويدىق. ولاردىڭ سيپاتتاماسى، ورنى جانە ساتىلىمعا قاتىسۋ ەرەجەلەرىمەن قالالىق ساۋلەت جانە قالا قۇرىلىسى باسقارماسىنىڭ سايتىندا تانىسۋعا بولادى، - دەدى اكىم.
قالا تۇرعىندارىنا بۇل اقپاراتتى بارىنشا تۇسىنىكتى ەتىپ جەتكىزۋ كەرەك. سونىمەن قاتار ءتۇرلى بۇرمالاۋلارعا جول بەرمەۋ كەرەك.
وسىنداي جاعدايلارعا جول بەرمەۋ ماقساتىندا جەر تەلىمدەرى ۇزاق ۋاقىتقا جالعا بەرىلەتىن بولادى، ال، ەگەر ولار يگەرىلمەيتىن بولسا، مەملەكەت ونى قايتارىپ الىپ، قايتا ءباسساۋداعا قويۋعا قۇقىلى. ساتىلىمدار ءار اپتا سايىن وتكىزىلەدى.
سۋ تاسقىنىنا قارسى شارالاردى ايتا كەلە، اكىم كەشەندى جوسپار اياسىندا جاسالىپ جاتقان جۇمىس باقىلاۋدا ەكەنىن اتاپ ءوتتى. قالالىق قۇرىلىمداردىڭ جاقسى جۇمىسىنىڭ ارقاسىندا يلينكا كەنتى سۋ تاسقىنىنان امان قالدى. قالادا سۋ باسۋ مەن توتەنشە جاعدايلارعا جول بەرمەۋ ءۇشىن بارلىق شارالار قولدانىلۋدا.
ەلوردا اكىمىنىڭ تاپسىرماسىمەن، قالا تۇرعىندارىنىڭ شاعىمدارىنا بايلانىستى قالا جولدارىن شۇعىل جوندەۋدەن وتكىزۋ جۇمىستارى جۇزەگە اسىرىلۋدا. بۇگىنگى كۇنى 116 مەكەنجاي بويىنشا جۇمىستار اتقارىلدى، قالعان جولدار بويىنشا جوندەۋ جوسپارلى تارتىپتە جۇرگىزىلەدى.
وتكەن جالپىقالالىق سەنبىلىك قورىتىندىسىن شىعارا كەلە اكىم «ءبىز تازا قالانى قولدايمىز!» ەكولوگيالىق ايلىعى جالعاساتىنىن ەسكە سالىپ، ونىڭ اياسىندا جاسالۋعا ءتيىس جۇمىستاردى بەلگىلەپ بەردى.
- ايلىق بارىسىندا قالانىڭ لاس بولىكتەرىن قامتىپ، قوقىستاردى جويۋ كەرەك، - دەدى قالا باسشىسى.
سونىمەن بىرگە اكىم كوپىرلەر مەن جاياۋ جۇرگىنشىلەر جولدارىن تازالاۋ، عيماراتتاردى قاپتايتىن ماتەريالداردى، ماڭدايشالاردى اۋىستىرۋ جانە باسقا دا جۇمىسقا نازار اۋداردى.
الداعى ماڭىزدى وقيعالار - ق ر پرەزيدەنتىنىڭ سايلاۋى، قازاقستان حالقى بىرلىگى كۇنىن تويلاۋ، جەڭىستىڭ 70 جىلدىعى سەكىلدى اتاۋلى كۇندەرگە قالانى دايىنداۋ جۇمىستارىنا ەرەكشە توقتالىپ ءوتتى.
- استانا ەلوردا رەتىندە بارلىق جاعىنان ۇلگى بولۋى ءتيىس. الدا جوعارى دەڭگەيدە وتكىزىلۋى ءتيىس ءبىرقاتار شارالار بار. جاۋاپتى ورگاندارعا الداعى شارالاردىڭ ءتيىستى دەڭگەيدە ءوتۋىن ۇيىمداستىرۋ بويىنشا شارا قولدانۋدى تاپسىرامىن، - دەپ قورىتىندىلادى اكىم.
