87 مىڭنان استام بالاعا ۆاكسينا سالىندى

نۇر-سۇلتان. قازاقپارات - وزبەكستاندا 87 مىڭنان استام بالاعا Pfizer ۆاكسيناسى سالىندى.

بۇل تۋرالى وزبەكستان دەنساۋلىق ساقتاۋ مينيسترلىگىنىڭ باسپا ءسوز قىزمەتى حابارلادى.

مينيسترلىكتىڭ مالىمەتىنشە، وزبەكستاننىڭ باس مەملەكەتتىك سانيتاريا دارىگەرى مەن ۇلتتىق تەحنيكالىق يممۋنولوگيالىق ساراپتامانىڭ شەشىمىمەن، 28-قىركۇيەكتەن باستاپ اتا- اناسى مەن قامقورشىلارىنىڭ كەلىسىمىمەن 12 جاستان اسقان بالالارعا ەرىكتى تۇردە ەكپە سالۋ ەنگىزىلدى. وسىعان دەيىن 12-15 جاس ارالىعىنداعى بالالارعا جاساعان زەرتتەۋدە كوروناۆيرۋسقا قارسى Pfizer ۆاكسيناسىنىڭ كلينيكالىق زەرتتەۋلەرىنىڭ ناتيجەلەرى بۇل ۆاكسينانىڭ جوعارى تيىمدىلىگى مەن قاۋىپسىزدىگىن كورسەتكەن بولاتىن، ال دۇنيەجۇزىلىك دەنساۋلىق ساقتاۋ ۇيىمى 12 جاستان اسقان بالالار مەن جاسوسپىرىمدەرگە Pfizer ۆاكسيناسىن سالۋدى ۇسىنعان.

«5-قازانداعى جاعداي بويىنشا ەلدە 12-18 جاس ارالىعىنداعى 87710 بالا Pfizer ۆاكسيناسىن ەرىكتى تۇردە سالدىردى. قازىرگى ۋاقىتتا ەلدە جاپپاي ۆاكسيناتسيالاۋدى 3138 ۆاكسيناتسيا پۋنكتى مەن 18 828 بريگادا جۇرگىزىپ جاتىر. 12 جاستان اسقان بالالارعا اتا- انالارى مەن قامقورشىلارىنىڭ كەلىسىمىمەن ايماقتىڭ كەز كەلگەن ۆاكسيناتسيا ورتالىعىندا كوروناۆيرۋسقا قارسى ەكپە الۋعا بولادى»، - دەپ حابارلادى دەنساۋلىق ساقتاۋ مينيسترلىگى.

ۆەدومستۆودا اتاپ وتكەندەي، ەلگە Pfizer/BioNTech ۆاكسيناسىنىڭ بارلىعى 1200000 دوزاسى كەلگەن، 5-قازاندا بۇل ۆاكسينانىڭ 465010 دوزاسى ۆاكسيناتسيا پروتسەسىندە قولدانىلدى.

Tengrinews.kz