بيىل قازاقستاننىڭ قارۋلى كۇشتەرىندە 86 قىلمىس تىركەلدى
بۇل تۋرالى بۇگىن ق ر ورتالىق كوممۋنيكاتسيالار قىزمەتىندەگى بريفينگتە ق ر قارۋلى كۇشتەرى باس اسكەري پوليتسياسى باسقارماسىنىڭ باسشىسى، پولكوۆنيك تىلەۋحان باسقوجايەۆ ءمالىم ەتتى، دەپ حابارلايدى قازاقپارات.
«رەسمي مالىمەتتەرگە جۇگىنەتىن بولساق، اعىمداعى جىلدىڭ باسىنان بەرى قارۋلى كۇشتەردە 86 قىلمىس تىركەلدى. ونىڭ ىشىندە مەرزىمدى قىزمەتكە شاقىرىلعان قاتارداعى 2 جاۋىنگەر الىمجەتتىككە ۇشىراعان. ال 2016-جىلى 268 قىلمىس بولىپ، ونىڭ ىشىندە 11 جاۋىنگەر الىمجەتتىككە ۇشىراعانى بەلگىلى بولىپ وتىر»، - دەدى تىلەۋحان باسقوجايەۆ ب ا ق وكىلدەرىنىڭ ساۋالىنا وراي.
سونداي-اق بريفينگ بارىسىندا ق ر قارۋلى كۇشتەرى باس شتابىنىڭ ۇيىمداستىرۋ-جۇمىلدىرۋ جۇمىستارى دەپارتامەنتى باسشىسىنىڭ ورىنباسارى، جيناقتاۋ باسقارماسىنىڭ باسشىسى، پولكوۆنيك امانتاي وسەربايەۆ ەلىمىزدە مەرزىمدى اسكەرگە شاقىرۋ الداعى ۋاقىتتا دا جالعاسا بەرەتىندىگىن ايتتى.
«بىرىنشىدەن، قازىردىڭ وزىندە ءبىزدىڭ قارۋلى كۇشتەرىمىزدىڭ 70 پايىزى كەلىسىمشارت بويىنشا قىزمەت اتقارادى دەپ ايتۋعا بولادى. ەكىنشىدەن، تەحنيكالىق بولىمدەر جانە اۋە، تەڭىز كۇشتەرىندەگى قىزمەتشىلەردىڭ 99 پايىزعا جۋىعى كەلىسىمشارت بويىنشا جۇمىس ىستەيدى. ەلباسىنىڭ تاپسىرماسىنا سايكەس جانە جۇمىلدىرۋ زاپاسىن تولىقتىرىپ وتىرۋ ءۇشىن بىزگە مەرزىمدى اسكەري قىزمەتكە شاقىرۋ جۇمىسىن جالعاستىرۋ قاجەت»، - دەدى وسەربايەۆ.
ونىڭ اتاپ وتۋىنشە، اعىمداعى كوكتەمدە اسكەري قىزمەتكە 16 مىڭعا جۋىق جاس سارباز شاقىرىلىپ وتىر. ول ەلىمىزدىڭ قارۋلى كۇشتەرىندەگى مەرزىمدى اسكەري قىزمەتشىلەردىڭ جالپى سانىنىڭ 25-30 پايىزىن قۇرايدى.
«مەرزىمدى اسكەري قىزمەتكە شاقىرىلعان اسكەري بولىمدەردە كوپ دايىندىقتى قاجەت ەتپەيتىن لاۋازىمدارعا قويىلادى. ال جوعارى ءبىلىم مەن ۇزاق ۋاقىت دايىندىقتى قاجەت ەتەتىن لاۋازىمدارعا كەلىسىمشارتتاعى اسكەري قىزمەتشىلەر تاعايىندالادى»، - دەدى ول.
اۆتور: مارلان جيەمباي
