ريو وليمپياداسىندا بارلىعى 86 مەملەكەتتىڭ وكىلدەرى جۇلدە الدى

استانا. قازاقپارات - ريو- دە- جانەيرو قالاسىنداعى «ماراكانا» فۋتبول ستاديونىندا 31 - جازعى وليمپيادا ويىندارىنىڭ جابىلۋ سالتاناتى جالعاسۋدا.
None
None

ءداستۇرلى شەرۋگە قازاقستاننىڭ وكىلدەرى دە قاتىسۋدا. اشىلۋ ساتىندەگىدەي، تۋدى جاس تايەكۆوندو شەبەرى رۋسلان جاپاروۆ كوتەرىپ شىقتى. الاڭعا تولى سپورتشىلار ءماز- ءمايرام. بىرەۋلەر قولدارىن بۇلعاپ، سالەم جولداسا، ەكىنشىلەرى ەستەلىك سۋرەتتەرگە تۇسۋدە. اسەم اۋەنگە بيلەپ جۇرگەندەر دە از ەمەس. ولار ءۇشىن 5-21 - تامىز ارالىعىندا وتكەن وليمپيادالىق ويىندار ارتتا قالدى.

 ريو وليمپياداسىنا الەمنىڭ 207 ەلىنەن  11544 سپورتشى قاتىسىپ، 306 مەدال جيىنتىعى ساراپقا سالىندى. جارىس قورىتىندىسىندا بارلىعى 86 مەملەكەتتىڭ وكىلدەرى جۇلدەگە قول جەتكىزدى. ال ۆەتنام، پۋەرتو- ريكو، سينگاپۋر، باحرەين، كوت- د'يۆۋار، كوسوۆو، فيدجي جانە يوردانيا سىندى سەگىز بىردەي ەلدىڭ سپورتشىلارى العاش رەت التىن جۇلدەنى يەلەندى. بۇل وليمپيادا ءورىسىنىڭ كەڭەيىپ، باسەكەلەستىكتىڭ كۇشەيىپ كەلە جاتقانىن كورسەتەدى. جالپى مەدالدار سانى جونىنەن ا ق ش سپورتشىلارى 46 التىن، 37 كۇمىس، 38 قولا، بارلىعى 121 جۇلدەنى جەڭىپ الىپ، كوماندالىق ەسەپتە 1-ورىندى يەلەندى. قازاقستان قۇراماسى 17 مەدالمەن (3 التىن، 5 كۇمىس، 9 قولا) 22- ورىنعا كوتەرىلدى. سپورتشىلار اراسىندا امەريكالىق ءجۇزۋ شەبەرى كەتي لەدەكيدىڭ ءبىر ءوزى ءتورت التىن، ءبىر كۇمىس مەدالدى جەڭىپ الىپ، ەلىنىڭ مەرەيىن اسىردى. سونداي- اق امەريكالىق تاعى ءبىر ءجۇزۋ شەبەرى مايكل فەلپس التىن مەدال سانىن 23-كە، يامايكالىق جەلاياق ۋسەين بولت 9 عا جەتكىزدى.

اۆتور: ەلجان ەرالى

سوڭعى جاڭالىقتار