قاڭتار وقيعاسى كەزىندە ۇرلانعان 860 قارۋ تاركىلەندى
بۇل تۋرالى ق ر ءى ءى م تەرگەۋ دەپارتامەنتى باستىعىنىڭ ورىنباسارى مۇحتار قوجايەۆ ايتتى، دەپ حابارلايدى قازاقپارات ءتىلشىسى.
«الماتى، تالدىقورعان جانە تاراز قالالارىنداعى جاپپاي تارتىپسىزدىكتەر بارىسىندا قىزمەتتىك جانە ازاماتتىق قارۋ ۇرلانعانى بەلگىلى. بۇل ءوز كەزەگىندە ازاماتتاردىڭ ءومىرى مەن دەنساۋلىعىنا شىنايى قاۋىپ ءتوندىردى. وسىعان وراي، ىشكى ىستەر مينيسترلىگى ۇرلانعان قارۋدى تابۋ جانە تاركىلەۋ بويىنشا بەلسەندى جۇمىستى جالعاستىرۋدا. بۇگىنگى تاڭدا، قابىلدانعان ءىس-شارالاردىڭ ارقاسىندا 860 قارۋ تاركىلەندى. ونىڭ ىشىندە 475 تابەلدىك جانە 379 ازاماتتىق قارۋ بار»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ماسەلەن، ونىڭ دەرەگىنشە، 13-شىلدە كۇنى تاراز قالاسىندا كريمينالدىق پوليتسيا جانە قىلمىستىق-اتقارۋ جۇيەسى قىزمەتكەرلەرىنىڭ جەدەل-ىزدەستىرۋ ءىس-شارالارىن جۇرگىزۋ بارىسىندا بۇركەمەلەنگەن جەرگە كومىلگەن قويما تابىلدى.
ول جەردەن بۇرىن پوليتسيا دەپارتامەنتىنەن ۇرلانعان كالاشنيكوۆ اۆتوماتى، ەكى وق ساۋىت جانە 30 دان استام وق-ءدارى الىندى. 19-شىلدەدە وسى قالادا پوليتسيا قىزمەتكەرلەرى گاراجدار ورنالاسقان جەردەن بۇرىن پوليتسيا دەپارتامەنتىنەن ۇرلانعان ماكاروۆ تاپانشاسىن تاپتى.
«ال 14- شىلدەدە الماتى وبلىسىنىڭ ىلە اۋدانىندا پوليتسيا جانە ۇ ق ك قىزمەتكەرلەرى بايسەركە كەنتىنىڭ تەمىرجول وتكەلى ماڭىنداعى جاسىرى قويمادان 12 كاليبرلى كەلتە مىلتىق، بولشەكتەلگەن اڭشىلىق مىلتىق، گاز تاپانشاسى، 3 جارىق دىبىستى جانە 2 گاز گراناتى، سونداي-اق 150 دەن استام پاترون تاۋىپ الدى. الماتى شەتىندەگى تاۋلى جەردەگى تاعى ءبىر جاسىرىن قويمادان 22 جارىق-دىبىستى، كوزدەن جاس اعىزاتىن جانە گاز-ءتۇتىندى گراناتا، 2 گاز تاپانشاسى، 12 كاليبرلى اڭشىلىق مىلتىق، راديوستانتسيا جانە ءار ءتۇرلى كاليبرلى 500 پاترون تابىلدى»، - دەدى دەپارتامەنت باستىعىنىڭ ورىنباسارى.
