ا ق ش جازۋشى حەمينگۋەيدىڭ كۋباداعى ءۇيىن قالپىنا كەلتىرۋ ءۇشىن 860 مىڭ دوللار بولمەك
1939 -جىلدان 1961 -جىلعا دەيىن جازۋشى تۇرعان فينكا ۆيحيا يەلىگى كۋبا استاناسى گاۆانانىڭ ماڭايىندا ورنالاسقان. Finca Vigia امەريكالىق قورى كۋبا بيلىگىنەن ءۇيدىڭ باستان- اياق قالپىنا كەلتىرۋى ءۇشىن ماتەريالداردى ا ق ش-تان اكەلۋگە رۇقسات الدى. اتالعان كەلىسىمگە سەنبى كۇنى قول قويىلىپ وتىر، دەپ حابارلايدى CNN تەلەارناسى.
جوباعا جازۋشى ءۇيىنىڭ جانىنان اۆتوردىڭ مىڭداعان قۇجاتى، ونىڭ ىشىندە جەكە حاتتار مەن شيماي داپتەرلەرىن جيناپ، قالپىنا كەلتىرۋ ماقساتىندا شەبەرحانا سالۋ دا قاراستىرىلعان. قور باسشىسى مەري-دجو ادامستىڭ مالىمەتىنشە، كۋبالىق بيلىكپەن حەمينگۋەي يەلىگىندە قالپىنا كەلتىرۋ جۇمىستارى بويىنشا كەلىسسوزدەر جۇرگىزۋ 2005 -جىلى باستالعان بولاتىن. الايدا ا ق ش پەن كۋبانىڭ قارىم-قاتىناسى شيەلەنىسىپ، جوبانىڭ ىسكە اسۋى مۇمكىن بولماعان ەدى.
2014 -جىلدىڭ جەلتوقسانىندا ا ق ش پرەزيدەنتى باراك وباما كۋبامەن ديپلوماتيالىق قارىم-قاتىناسىن، سونداي-اق ساۋداداعى شەكتەۋلەردى جەڭىلدەتىپ، قالپىنا كەلتىرەتىندىگىن مالىمدەگەن.
بۇدان كەيىن جوبا ەكىجاقتى قولداۋعا يە بولدى. جازۋشىنىڭ جەسىرى كىتاپتار، كيىمدەر، ءتىپتى سپيرتتەلگەن كەسىرتكەلەر توپتاماسى ورنالاساتىن مۇراجاي جاساپ شىعۋ ءۇشىن ءۇيدى كۋبا بيلىگىنە بەرىپ وتىر.
