الەمنىڭ ءار تۇكپىرىندە جۇرگەن اقتوبەلىكتەر وبلىستىڭ 85 جىلدىعىنا جينالادى

اقتوبە. قازاقپارات - بيىل اقتوبە وبلىسىنا 85 جىل.

«اقتوبە - قۇتتى مەكەن!» اتاۋىمەن وتەتىن اتاۋلى داتا كەزىندە الەمنىڭ ءار تۇكپىرىندە جۇرگەن اقتوبەلىكتەر شاقىرىلادى، دەپ حابارلايدى قازاقپارات ءتىلشىسى.

ۇكىمەتتىك ەمەس ۇيىم وكىلدەرىمەن كەزدەسكەن وبلىس اكىمى بەردىبەك ساپاربايەۆ الداعى كۇندەردىڭ ءبىرقاتار جوسپارىمەن ءبولىستى.

ماسەلەن، اقتوبەدە جۇبانوۆتار ءۇيى، انالارعا تاعزىم ءۇيى سالىنۋى مۇمكىن. ال بيىل قىركۇيەك ايىندا وبلىستىڭ 85 جىلدىعى اتالىپ وتىلەدى.

«اقتوبە - قۇتتى مەكەن!» 85 جىلدىق وسى اتاۋمەن وتەدى. ءبىز جەرلەستەرىمىزدى شاقىرامىز. ولار وزدەرىنىڭ ۇسىنىستارىمەن كەلۋى كەرەك.

ماسەلەن، ا ق ش- تا تۇراتىن وليمپيادا چەمپيونى ۆالەري لۋكين كەلەمىن دەدى. ول ءبىزدىڭ سپورتشىلارىمىزعا قولداۋ كورسەتىپ، جانىنا الىپ، تاربيەلەۋگە دايىن»، - دەدى وبلىس اكىمى بەردىبەك ساپاربايەۆ.

ۇكىمەتتىك ەمەس ۇيىم وكىلدەرى دە اتاۋلى داتاعا وراي ءوز ۇسىنىستارىن بەرۋى قاجەت. ال اقتوبەدە تۋىپ، ءوسىپ، تاربيە العان، كەيىن ءار ەلگە كەتىپ، ەڭبەك ەتىپ جۇرگەن بارلىق ازامات كۇزدە ارنايى شاقىرىلادى.

ولار تۋعان جەردىڭ دامۋىنا ۇلەس قوسۋى ءۇشىن ءوز ۇلەستەرىن قوساتىن كەز جەتتى.

«كىمدى بىلمەيمىز، كىم ەسكەرۋسىز قالدى؟ بيزنەس، ونەر، مادەنيەت، سپورت سەكىلدى ءار سالانىڭ ادامدارىن شاقىرىپ، ۇسىنىستار تىڭدايمىز، قولداۋلارىن كۇتەمىز»، - دەدى ب. ساپاربايەۆ.

ايتا كەتەيىك، اقتوبەنىڭ 85 جىلدىعىنا وراي وڭىردە ارنايى توپ قۇرىلدى. توپقا وبلىستىق ءماسليحات حاتشىسى ءسانيا قالدىعۇلوۆا ءتوراعالىق ەتەدى.

اۆتور: التىناي ساعىندىقوۆا