برازيليا وليمپياداسىندا 85 مىڭ ادام قاۋىپسىزدىكتى قامتاماسىز ەتەدى

استانا. قازاقپارات - تامىز ايىندا برازيليالىق ريو-دە-جانەيرو قالاسىندا وتەتىن وليمپيادا ويىندارىنداعى قاۋىپسىزدىكتى 85 مىڭ ادام، سونىڭ ىشىندە 38 مىڭ اسكەري قىزمەتشى قامتاماسىز ەتپەك.

بۇل تۋرالى تاسس وڭتۇستىك امەريكالىق ەلدىڭ قورعانىس ءمينيسترى الدۋ ريبەلۋگە سىلتەمە جاساپ حابارلادى.

20 مىڭ اسكەري قىزمەتشى ريو-دە-جانەيرودا، تاعى 18 مىڭى وليمپيادالىق فۋتبول ماتچتارى وتەتىن بەس قالاعا تارتىلماق. بۇل جەردە برازيليا، بەلۋ-وريزونتۋ، ماناۋسە، سان-پاۋلۋ جانە سالۆادور قالالارى تۋرالى ءسوز بولىپ وتىر.

بەكىتىلگەن سحەماعا سايكەس ريو-دە-جانەيرو ءتورت قاۋىپسىزدىك ايماعىنا بولىنەدى: باررا، دەودورو، ماراكانا جانە كوپاكابانا.

قورعانىس ءمينيسترىنىڭ سوزىنە قاراعاندا، برازيلياداعى ۇكىمەتكە قارسى تاراپ پەن ونىڭ جاقتاستارى ۇيىمداستىرۋى مۇمكىن مانيفەستاتسيالار ويىنداردىڭ وتۋىنە كەدەرگى كەلتىرمەيدى. «مەنىڭ ويىمشا، 2013-جىلى بولعان سياقتى قوعامدىق اكتسيالار وتپەيدى. وليمپيادا تىنىش وتەدى»، - دەدى ريبەلۋ.

XXXI جازعى وليمپيادا 2016-جىلى 5-21- تامىز ارالىعىندا وتەدى. بۇل وڭتۇستىك امەريكادا وتەتىن العاشقى وليمپيادا ويىندارى بولادى. پاراليمپيادا بىرنەشە اپتادان كەيىن: 7- 18- قىركۇيەك ارالىعىندا وتەدى.