بۇگىن - قازاقتىڭ ۇلى كومپوزيتورى ءشامشى قالداياقوۆتىڭ تۋعانىنا 85 جىل

قازاقستاننىڭ حالىق ءارتىسى، قازاقستاننىڭ قازىرگى ءانۇرانىنىڭ اۆتورى ءشامشى قالداياقوۆتىڭ حالقىمىزدىڭ رۋحاني ءومىرى مەن مۋزىكالىق مادەنيەتىندەگى الاتىن ورنى وراسان.
سازگەر 1930 - جىلى 15 - تامىزدا وڭتۇستىك قازاقستان وبلىسىنىڭ وتىرار اۋدانىندا تۋعان. سارى اعاشتاعى قاپىلانبەك مالدارىگەرلىك تەحنيكۋمىن، تاشكەنتتەگى مۋزىكا ۋچيليشەسىن، الماتى مەملەكەتتىك كونسەرۆاتورياسىن بىتىرگەن.
1950 - جىلدان باستاپ شىعارماشىلىق قىزمەتپەن اينالىسقان. ول ۇلتتىق مۋزىكا ونەرىنىڭ ءان جانرىنا اسا ايقىن، سوڭعى لەپ الا كەلگەن سازگەر رەتىندە تانىلدى. ونىڭ اندەرى قۇلاققا جاعىمدى، جۇرەككە جىلى قابىلدانىپ، جۇرتشىلىقتىڭ سۇيىسپەنشىلىگىنە بولەندى.
كومپوزيتور شىعارمالارىنىڭ تاقىرىپتىق، مازمۇندىق اۋقىمى اسا كەڭ. ەلگە، جەرگە، وتانعا، اتا- اناعا، جارعا، دوس- جارانعا دەگەن سۇيىسپەنشىلىك - ءشامشى شىعارمالارىنىڭ باستى تاقىرىبى. قازاقتىڭ مۋزىكا ونەرىندە ءشامشىنىڭ ورنى ەرەكشە 300 گە جۋىق ءانى بار.
ونىڭ ازاماتتىق ليريكاعا تۇنعان، رەسپۋبليكامىزدىڭ كەڭ بايتاق جەرىن جىرعا قوساتىن «اق ەركە - اق جايىق»، «ارىس جاعاسىندا»، «سىر سۇلۋى»، «تەرىسكەي»، «قارقارالى»، « ءومىر وزەن»، ت. ب. تۋىندىلارىن جۇرتشىلىق ەرەكشە ىقىلاسپەن قابىلدادى. كومپوزيتوردىڭ مارش ەكپىندى، جىگەرلى، شاتتىقپەن شىرقالاتىن «مەنىڭ قازاقستانىم»، «باقىت قۇشاعىندا»، «بارىنەن دە سەن سۇلۋ» سياقتى اندەرى حالىق اراسىنا كەڭىنەن تارادى.
ءشامشى قالداياقوۆ 1992 - جىلى 29 - اقپاندا جاسى 62 گە قاراعان شاعىندا ۇزاققا سوزىلعان اۋىر ناۋقاستان قايتىس بولدى.
ق ر پرەزيدەنتى نۇرسۇلتان نازاربايەۆ ءشامشى قالداياقوۆتىڭ شىعارماشىلىعىنا بايلانىستى ءۇش بىردەي جارلىققا قول قويدى. ەلباسىنىڭ ءبىرىنشى جارلىعىمەن وعان «قازاقستاننىڭ حالىق ءارتىسى» قۇرمەتتى اتاعى (1991 ج. ) بەرىلسە، ەكىنشى جارلىعىمەن كومپوزيتوردىڭ «مەنىڭ قازاقستانىم» شىعارماسى ءانۇرانعا (2006 ج. ) اينالدى، ال ءۇشىنشى جارلىعىمەن ءشامشى مەملەكەتتىك سىيلىقتىڭ لاۋرەاتى (2010 ج. ) اتاندى.
1992 - جىلدان باستاپ سازگەرلەر مەن انشىلەر ءۇشىن قالداياقوۆ اتىنداعى حالىقارالىق بايقاۋ- فەستيۆال ءداستۇرلى تۇردە وتكىزىلىپ تۇرادى.
شىمكەنت قالاسىندا وبلىستىق فيلارمونيا، ءبىر كوشە، الماتى قالاسىندا ءبىر كوشە، كومپوزيتور تۋعان ولكە - ءشاۋىلدىر اۋىلىنداعى مۋزىكا مەكتەبى ش. قالداياقوۆ ەسىمىمەن اتالادى. شىمكەنت فيلارمونياسىنىڭ الدىنا قالداياقوۆ ەسكەرتكىشى ورناتىلعان. ال ءشامشىنىڭ پيانينوسى ۇلتتىق مۋزەيگە سىيعا تارتىلعان قۇندى جادىگەر.
1991 - جىلى ش. قالداياقوۆ جايلى عۇمىرنامالىق «جىلدارىم مەنىڭ، جىرلارىم مەنىڭ» (رەجيسسەرى ت. احمەتوۆ) دەرەكتى فيلمى ءتۇسىرىلىپ، «ءشامشى عۇمىر» ەستەلىكتەر مەن ماقالالار جيناعى جارىق كوردى.