قازاقتىڭ بۇلبۇلى بيبىگۇل تولەگەنوۆا 85 جاسقا تولدى
بيبىگۇل احمەت قىزى تولەگەنوۆا 1929-جىلى سەمەي قالاسىندا تۋعان. 1954-جىلى قازاق كونسەرۆاتورياسىن (ن. سامىشينانىڭ ءان كلاسى بويىنشا) ءبىتىردى. ءان ايتۋدى كوركەم-ونەرپازدار ۇيىرمەسىنەن باستادى. ب. تولەگەنوۆانىڭ انشىلىك تالانتىن تانىپ، ونىڭ ونەر جولىنا تۇسۋىنە باعىت سىلتەگەن ءارى العاش ءدارىس بەرگەن كەڭەس جازۋشىسى گ. ي. سەرەبرياكوۆا (سول كەزدە سەمەيدە تۇرعان) بولدى. ب. تولەگەنوۆا ەڭبەك جولىن 1946-جىلى سەمەيدىڭ ەت كومبيناتىندا جۇمىسشىلىقتان باستادى. ءبىرسىپىرا ۋاقىت قازاقتىڭ وپەرا جانە بالەت تەاترىندا ىستەدى. 1965-1971-جىلدارى قازاق فيلارمونياسىنىڭ ءانشى-ءسوليسى بولدى. 1971-جىلدان قازاقتىڭ وپەرا جانە بالەت تەاترىندا ەڭبەك ەتەدى. ب. تولەگەنوۆانىڭ قايتالانباس ورىنداۋشىلىق ونەرىنىڭ قاينار بۇلاعى - قازاقتىڭ حالىق اندەرى. ءانشىنىڭ الۋان تاقىرىپتى رەپەرتۋارىندا قازاقتىڭ حالىق اندەرى («گاۋھار تاس»، «جيىرما بەس»)، قازاقستان كومپوزيتورلارىنىڭ شىعارمالارى (ءحاميديدىڭ «بۇلب ۇلى»، برۋسيلوۆسكيدىڭ «قوس قارلىعاشى»، تولەبايەۆتىڭ «ەسكە الۋى»، راحمادييەۆتىڭ «تارانتەللاسى»، مۇحامەدجانوۆتىڭ «كوكتەم ءۆالسى»، تىلەنديەۆتىڭ «كەل ەركەم، الاتاۋىما»، پ. پ. چايكوۆسكي مەن س. ۆ. راحمانينوۆتىڭ رومانستارى، ن. ا. ريمسكي-كورساكوۆتىڭ وپەرالارىنان اريالار، سونداي-اق باتىس ەۋروپا سازگەرلەرىنىڭ (دونيتسەتتي، گريگ، شۋبەرت) شىعارمالارى دا بار. ب. تولەگەنوۆا ءوزىنىڭ كونسەرتتىك- ورىنداۋشىلىق ونەرىن شەبەرلىكتىڭ جوعارى ساتىسىنا كوتەرىپ، كلاسسيكالىق دارەجەگە جەتكىزدى. بۇل تۇرعىدا ول «قازاق بۇلبۇلى» اتانعان ك. بايسەيىتوۆانىڭ ورىنداۋشىلىق شەبەرلىگىن جالعاستىرۋدا. تولەگەنوۆا وپەرا ونەرىنە دە ەلەۋلى ۇلەس قوسىپ، جىبەك (برۋسيلوۆسكيدىڭ «قىز جىبەگىندە»)، گۇلبارشىن (راحماديەۆتىڭ «الپامىسىندا»)، ەڭلىك (ءجۇبانوۆتىڭ «ەڭلىك-كەبەگىندە»)، دجيلدا، ۆيولەتتا (ۆەرديدىڭ «ريگولەتتوسى» مەن «تراۆياتاسىندا») ت. ب. پارتيالاردى ورىندادى. ب. تولەگەنوۆانىڭ ونەرى رەسپۋبليكا، وداق كولەمىندە عانا ەمەس، بۇكىل دۇنيە جۇزىنە تانىلدى. گاسترولدىك ساپارمەن ءۇندىستان، الجير، ەگيپەت، سيريا، ۆەتنام، پولشا، چەحوسلوۆاكيا، كانادا، شۆەتسيا، فرانسيا، يتاليادا بولىپ، ونەر تولعادى. ك س ر و مەملەكەتتىك سىيلىعىنىڭ (1970) جانە قازاق ك س ر مەملەكەتتىك سىيلىعىنىڭ (1960) لاۋرەاتى. 1957, 1958-جىلدارى ماسكەۋدە وتكەن ونشىلەر بايقاۋىنىڭ لاۋرەاتى. УӀӀ-ӀХ سايلانعان قازاق ك س ر جوعارعى كەڭەسىنىڭ دەپۋتاتى. لەنين وردەنى جانە ەڭبەك قىزىل تۋ وردەنىمەن، مەدالدارمەن ماراپاتتالعان. قازاقستان رەسپۋبليكاسى پرەزيدەنتىنىڭ جەكە التىن بەلگىسىمەن (1999) ماراپاتتالعان. ك س ر و جانە قازاقستان رەسپۋبليكاسى مەملەكەتتىك سىيلىقتارىنىڭ، «تارلان» تاۋەلسىز سىيلىعىنىڭ (2001) لاۋرەاتى. «جىل ادامى» اتاعىن العان (2001. قازاقستان جۇلدىزدار اللەياسىندا جەكە جۇلدىزعا يە (2002). «وراق جانە بالعا» مەدالىنىڭ جانە لەنين وردەنىنىڭ ۇسىنىلۋىمەن قوسا سوتسياليستىك ەڭبەك ەرى (1991). استانا قالاسىنىڭ جانە شىعىس قازاقستان وبلىسىنىڭ قۇرمەتتى ازاماتى.
«قازاقپارات» حالىقارالىق اقپارات اگەنتتىگى بيبىگۇل احمەت قىزىن مەرەيتويىمەن قۇتتىقتايدى جانە ۇزاق عۇمىر تىلەيدى.
اۆتور: جاسۇلان جولدىبايەۆ
