ۇيىنە تۇسكەن ەكى ۇرىنى 85 جاستاعى اجە ساباپ، پوليتسياعا ۇستاپ بەردى

استانا. قازاقپارات - ءۇندىستاندىق راتلام قالاسىندا تۇراتىن 85 جاستاعى كارى اجەي ۇيىنە تۇسكەن ەكى ۇرىعا قارسىلىق كورسەتىپ، ولاردىڭ توناۋىنا جول بەرمەدى، دەپ جازادى شەتەلدىك ب ا ق.

جاپا شەگۋشى پوليتسيا قىزمەتكەرلەرىنە ۇيدە جالعىز تۇراتىنىن ايتقان. كۇيەۋى قايتىس بولعان. ال بالالارى بولسا مۋمبايدا جۇمىس ىستەيدى ەكەن.

ۇرىلار ۇيگە كىرگەن كەزدە كەمپىر ويانىپ كەتىپتى. ولاردىڭ قارا نيەتتى ادامدار ەكەنىن سەزىسىمەن، بىرەۋىن شەلەكپەن ءبىر قويىپ، ەكىنشىسىن تاياقتىڭ استىنا العان. وسى كەزدە كورشىلەرى ايعاي شۋدى ەستىپ، دەرەۋ پوليتسيا شاقىرتقان. ساقشىلار وقيعا ورنىنا بىرنەشە مينۋت ىشىندە جەتكەن. وسىلايشا ەكى ۇرى 85 تەگى كەمپىردەن تاياق جەپ، قولعا تۇسكەن.

پوليتسيا بولىمشەسىندە اجەيگە ۇرىلاردى ۇستاۋ بارىسىندا كورسەتكەن باتىلدىعى ءۇشىن 5000 رۋپي سىي اقى بەرىپتى. ول شامامەن 80 دوللار بولادى ەكەن.