وسكەمەندە جالعان كاسىپكەر مەملەكەتكە 852 ميلليون تەڭگە سالىق تولەمەگەن
قارجى مونيتورينگى كوميتەتىنىڭ شىعىس قازاقستان وبلىسى بويىنشا ەكونوميكالىق تەرگەۋ دەپارتامەنتى ءىس جۇزىندە جۇمىس ورىنداماي، قىزمەت كورسەتپەي، تاۋاردى تيەپ-جونەلتپەي شوت-فاكتۋرا جازۋ فاكتىسىنىڭ جولىن كەستى.
جەدەل ىزدەستىرۋ شارالارىنىڭ بارىسىندا كۇدىكتىنىڭ ەكىنشى دەڭگەيلى بانكتە اقشا قاراجاتىن جۇيەلى تۇردە قولما-قولعا اينالدىرىپ وتىرعانى انىقتالدى. وسكەمەن قالاسىنداعى ءبىر بانكتە 14,9 ميلليون تەڭگە كولەمىندەگى اقشا قاراجاتىن قولما-قولعا اينالدىرۋ بارىسىندا جالعان كاسىپورىن باسشىسى ۇستالدى.
وسكەمەن تۇرعىنى 2015-2019-جىلدار ارالىعىندا جالعان 4 كاسىپورىندى تۋىستارى مەن تانىستارىنا تىركەي وتىرىپ، جالعان بۋحگالتەرلىك قۇجاتتاردى جازىپ بەرۋمەن اينالىسقان. بۇل كاسىپورىنداردا كاسىپكەرلىك قىزمەتتى جۇزەگە اسىرۋ ءۇشىن اۆتوكولىك، ءۇي-جاي، وندىرىستىك تەحنيكالىق بازا جانە قىزمەتكەرلەر شتاتى بولماعان.
جالعان فيرما باسشىلارىنىڭ قارجى شارۋاشىلىق ماسەلەسىمەن اينالىسپاعانى، بۋحگالتەرلىك ەسەپ جۇرگىزبەگەنى جانە سالىق ەسەبىن تاپسىرماعانى انىقتالدى. ءىس جۇزىندە فيرمالار قىلمىستىق ءىس-ارەكەتتى جۇزەگە اسىرۋ ءۇشىن، كونتراگەنتتەرگە سالىقتان جالتارۋ ءۇشىن جالعان ەسەپشوت جازىپ بەرۋمەن اينالىسقان.
ناتيجەسىندە مەملەكەتكە تولەنبەگەن سالىق تۇرىندە 852,5 ميلليون تەڭگە كولەمىندە شىعىن كەلگەنى انىقتالدى.
وسكەمەن قالاسى 2№ سوتىنىڭ ۇكىمىمەن ايىپتالۋشى ق ر ق ك 28 جانە 216- باپتارىنىڭ 3- ءبولىمى بويىنشا كىنالى دەپ تانىلىپ، شارتتى تۇردە 3 جىلعا باس بوستاندىعىنان ايىرىلدى.
