قىزىلوردادا 84 جاستاعى قاريا كوروناۆيرۋس ۆاكسيناسىن سالدىردى
سىرداريا اۋدانىنىڭ تۇرعىنى جۇماعالي مىرزاعاليەۆ 84 جاسقا تولدى. ول وتباسىمەن بىرگە ەكپە قابىلداپ، ەندى تۇرعىنداردى ۆاكسينا سالدىرۋعا شاقىرادى.
«مەنىڭ جاسىم 84-تە. قىزىم، نەمەرەلەرىم دارىگەر. وسى ۋاقىتقا دەيىن ءتۇرلى اۋرۋعا قارسى ەكپە قابىلداپ جۇرگەن ەدىم. ولاردىڭ قاتارىندا تۇماۋعا قارسى ەكپەلەردى جىلدا- جىل الىپ، دەرتتىڭ ءبارىن ەڭسەردىم»، - دەيدى ەڭبەك ارداگەرى.
ەڭبەك ارداگەرى كوروناۆيرۋس ىندەتىنە قارسى ساقتىق شارالارىن قامتاماسىز ەتۋ ءۇشىن سىرداريا اۋداندىق ورتالىق اۋرۋحاناسىنا كەلىپ، ءوزىنىڭ جانە وتباسىسىنىڭ ساۋلىعى ءۇشىن ەكپە قابىلداعان.
«ءوز وتباسىمدا 18 جاسقا تولعان ادامنىڭ بارلىعى كوروناۆيرۋسقا قارسى ەگىلگەن. ماماندار الدىمەن مەنىڭ قان قىسىمىمدى، دەنە قىزۋىمدى ولشەدى. بۇعان دەيىن قابىلداعان ەم- دومدارىندى ساراپتاپ، ەكپە قابىلداۋعا جارايتىنىمدى انىقتادى. ءسويتىپ، ەكپەنىڭ ءبىرىنشى كەزەڭىن الدىم. ەكپە قابىلداعاننان كەيىن كۇتۋ زالىندا دارىگەرلەردىڭ باقىلاۋىندا بولدىم. دەنەمدە ەشقانداي وزگەرىس، كەرى ناتيجە بولعان جوق. ءقازىر ەكپەگە قاتىستى الىپ- قاشپا اڭگىمە كوپ. بوس سوزگە سەنۋگە بولمايدى. دارىگەرلەردىڭ عانا كەڭەسىنە قۇلاق اسقان ءجون»، - دەيدى زەينەتكەر.
ايتا كەتسەك، قازىر قىزىلوردا وبلىسىندا ىندەت جۇقتىرعان 12580 ادام تىركەلسە، ونىڭ 77 پايىزى جازىلدى. پنيەۆمونيامەن اۋىرعان 1867 ناۋقاستىڭ 1580 ى ەمدەلىپ شىقتى. وسى جىلدىڭ ماۋسىم- شىلدە ايلارىندا ينفەكسيالىق توسەك- ورىن سانى 585-تەن 2340-قا دەيىن، ال رەانيماتسيالىق توسەك ورىن سانى 90-نان 172-گە دەيىن كوبەيتىلدى. قازىرگى تاڭدا جۇكتەمە 55 پايىزدى قۇراپ وتىر. ەسكە سالساق، قىزىلوردا وبلىسىندا تۇرعىنداردىڭ 61 پايىزى ۆاكسينا سالدىردى.
اۆتور: ءادىلجان ۇمبەت
