قاۋىپسىز جول ءىس-شاراسىندا جۇرگىزۋشى كۋالىگىنەن ايىرىلعان 841 ادام انىقتالدى
بۇل جايىندا ق ر ىشكى ىستەر مينيسترلىگىنىڭ رەسمي وكىلى نۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.
«جول- كولىك وقيعالارىن ازايتۋ، جول قوزعالىسى ەرەجەلەرىن بۇزۋدىڭ الدىن الۋ ءۇشىن 17-مامىردان باستاپ ەلىمىزدە ء«قاۋىپسىز جول» الدىن الۋ ءىس-شاراسى وتكىزىلۋدە. ءىس- شارا بارىسىندا قوزعالىس قاۋىپسىزدىگى ءۇشىن اۆتوجولداردىڭ اپاتتى- قاۋىپتى ۋچاسكەلەرى مەن جوندەۋ جۇمىستارى ورىندارى دا قوسىمشا تەكسەرىلەدى. پاترۋلدىك پوليتسيانىڭ ماقساتى - جول كولىك وقيعالارىنىڭ نەگىزگى سەبەپتەرىنىڭ الدىن الۋ»، - دەدى ول.
ونىڭ اتاپ وتۋىنشە، جىلدامدىق رەجيمىن بۇزۋ، باسىپ وزۋ، مانيەۆر جاساۋ، قيىلىستار مەن جاياۋ جۇرگىنشىلەر وتكەلدەرىنەن ءوتۋ، ماس كۇيىندە كولىكتى باسقارۋ جانە تاعى باسقا قۇقىق بۇزۋشىلىقتاردى انىقتاۋ باعىتىنداعى جۇمىستار كۇشەيتىلدى.
«جول قوزعالىسىن قاداعالاۋ كەزىندە ءبىر اپتا ىشىندە 49 مىڭعا جۋىق جول قوزعالىسى ەرەجەلەرىن بۇزۋدىڭ جولى كەسىلدى. ونىڭ ىشىندە كولىكتى ماس كۇيىندە باسقارعانى ءۇشىن جۇرگىزۋشى كۋالىگىنەن ايىرىلعان 841 جۇرگىزۋشى انىقتالدى. پوليتسيا جىلدامدىقتى اسىرعانى ءۇشىن 7 مىڭنان استام جۇرگىزۋشىنى، قاراما-قارسى قوزعالىس جولاعىنا شىققانى ءۇشىن 300 دەن استام، اپاتتى جاعداي جاساعانى ءۇشىن 600-دەن استام جانە باعدارشامنىڭ تىيىم سالاتىن بەلگىسىنە وتكەنى ءۇشىن 1143 جۇرگىزۋشىنى جاۋاپقا تارتتى»، - دەدى رەسمي وكىل.
سونىمەن قاتار نۇردىلدا ورازدىڭ ايتۋىنشا، قوعامدىق جولاۋشىلار كولىگى جۇرگىزۋشىلەرى جول بەرگەن 776 ەرەجە بۇزۋشىلىق انىقتالدى. ونىڭ 687 سى زاڭسىز قايتا جابدىقتاۋ فاكتىسى بولسا، 56 سى ەرەجە بۇزۋشىلىق رەيس الدىنداعى تەحنيكالىق تەكسەرۋدەن وتپەگەنى بويىنشا تىركەلدى. اۆتوجولداردىڭ 7 مىڭ شاقىرىمنان استام اپاتتى- قاۋىپتى ۋچاسكەلەرى تەكسەرىلدى.
سونداي-اق 1197 جول بەلگىلەرى قويىلدى.
