قاڭتار وقيعاسىنا قاتىستى 83 ادام باس بوستاندىعىنان ايىرۋ جازاسىنا كەسىلدى
بۇل تۋرالى ق ر باس پروكۋراتۋراسى قىلمىستىق قۋدالاۋ قىزمەتى باسشىسىنىڭ ورىنباسارى ەلدوس قيلىمجانوۆ ءمالىم ەتتى، دەپ حابارلايدى قازاقپارات ءتىلشىسى.
«8 وڭىردە 30 مىڭنان استام تەرگەۋ جۇرگىزىلدى. 4 مىڭنان اسا سوت ساراپتاماسى تاعايىندالدى. مىندەتتى تەرگەۋ ارەكەتتەرى قىلمىستارعا ءار قاتىسۋشىسىنىڭ ءرولىن انىقتاۋ، ونىڭ ارەكەتتەرىن وبەكتيۆتى باعالاۋ جانە زاڭدى پروتسەستىك شەشىم قابىلداۋ ءۇشىن جاسالادى. قازىرگى ۋاقىتتا 349 كۇدىكتى قاماۋدا وتىر»، - دەدى ەلدوس قيلىمجانوۆ ورتالىق كوممۋنيكاتسيالار قىزمەتىندە.
ونىڭ ايتۋىنشا، كۇدىكتىلەردىڭ عيماراتتاردى ورتەۋگە، قارۋدى جىمقىرۋعا، مەملەكەتتىك نىساندارعا جانە قۇقىق قورعاۋ ورگاندارى قىزمەتكەرلەرىنە قارۋلى شابۋىل جاساۋعا بەلسەندى تۇردە قاتىسقاندىعى انىقتالعان. ءاربىر قاماۋعا الىنعان ادام بويىنشا ولاردىڭ قىلمىستارعا قاتىستىلىعى تۋرالى جەتكىلىكتى مالىمەتتەر بار.
جالپى، قاڭتار وقيعالارى بويىنشا سوتقا 479 قىلمىستىق ءىس جولدانىپ، ولار بويىنشا 545 ادام ءىستى بولدى.
ەلدوس قيلىمجانوۆتىڭ سوزىنە قاراعاندا، قاڭتار وقيعاسىنا قاتىستى قازاقستاندا 83 ادام ناقتى باس بوستاندىعىنان ايىرۋ جازاسىنا كەسىلدى. ولار بيلىك وكىلدەرىنە قاتىستى كۇش قولدانعانى، مۇلىكتەردى زاقىمداۋعا بايلانىستى اۋىر قىلمىستاردى جاساعاندارى، زالالدى وتەمەگەنى ءۇشىن جاۋاپقا تارتىلدى.
بۇدان بۇرىن حابارلانعانداي، قازىرگى كەزدە ارنايى پروكۋرورلاردىڭ ءىس جۇرگىزۋىندە جاپپاي تارتىپسىزدىكتەر بويىنشا 53 جانە تەرروريزم اكتىلەرىنە قاتىستى 32 قىلمىستىق ءىس بار.
مەملەكەتتىك وبەكتىلەردى ورتتەۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعانى بەلگىلى بولدى.
