شىعىستا 83 ەلدى مەكەنگە سۋ جايىلۋ قاۋپى بار
ازاماتتىق قورعانىس قىزمەتىنىڭ وكىلدەرى شىعىس قازاقستاندا باس قوسىپ، «كوكتەم-2018» رەسپۋبليكالىق جاتتىعۋ جيىندارىن وتكىزۋدە. جيىننىڭ ەكىنشى كۇنىندە توتەنشە جاعداي ماماندارى وسكەمەن قالاسى مەن گلۋبوكوە، زىريان، بەسقاراعاي اۋداندارىندا تاجىريبە وتكىزدى.
وسكەمەن ماڭىنداعى «ەرتىس-2» ساياجاي اۋدانىندا ەرتىستىڭ تاسقىنىنان زارداپ شەككەن تۇرعىنداردى «نيۆا- مارش» ۇشقىر قايىعىمەن قۇتقارۋ جاتتىعۋى ۇيىمداستىرىلىپ، 13 قىزمەتتىڭ سەلبەسىپ جۇمىس ىستەۋى تەكسەرىلدى.
بۇل ۋاقىتتا تەمىرجول قىزمەتىنىڭ ماماندارى گلۋبوكوە اۋدانىنىڭ كازييەۆكا ستانساسىندا «رەلستەن شىققان ۆاگونداردى» جولعا سالۋمەن اۋرە بولىپ جاتتى. ال پويىزدىڭ جولىن توسقان تاسقىن سۋ قۇم توسەۋ ارقىلى «اۋىزدىقتالدى» .
زىريان اۋدانىنىڭ زۋبوۆسك اۋىلىندا قۇتقارۋشىلار بوگەتتەن اسقان سۋدى «توقتاتتى» . قار سۋى ەلدىڭ مازاسىن ەندى «الماۋى» ءۇشىن دامبا بيىكتەتىلدى.
شىعىس وڭىرلىك اەروۇتقىر قۇتقارۋ جاساعىنىڭ جىگىتتەرى تىكۇشاق پەن رەزەڭكە قايىقتاردىڭ ۇيلەسىمدى جۇمىسىن كورسەتىپ، بەسقاراعاي اۋدانىنىڭ سۋ «قۇرساۋىندا قالعان» تۇرعىندارىن قاۋىپسىز جەرگە كوشىردى.
«بۇل جاتتىعۋلارعا بارلىق وبلىستاردان 15 جاساق قاتىستى. شىعىستا سۋ باسۋ قاۋپى جوعارى 83 ەلدى مەكەن تىركەلىپ وتىر. بۇگىن سول ەلدى مەكەندەرگە قانداي كومەك كورسەتە الاتىنىمىزدى ءىس جۇزىندە تەكسەرىپ الدىق. جەرگىلىكتى قىزمەتتەر قاردىڭ ەرۋ قارقىنىن، وزەندەردىڭ مۇزدان ارىلۋىن ۇدايى نازاردا ۇستاپ وتىر. ارىپتەستەرىمىزدىڭ بۇگىنگى بىرلەسكەن ارەكەتتەرىن «جاقسى» دەپ باعالاۋعا بولادى» - دەيدى توتەنشە جاعدايلار كوميتەتى ءتوراعاسىنىڭ ورىنباسارى مارات كۇلدىكوۆ.
ە
كى كۇندىك جاتتىعۋ جيىنىنا شىعىس قازاقستان اتىنان 100 ادام مەن 33 تەحنيكا قاتىستى.
