استانا قالاسىندا 83 مىڭنان اسا بالا بالاباقشا كەزەگىندە تۇر

بۇل تۋرالى بۇگىن ەلوردانىڭ بىلىم قىزمەتكەرلەرى جينالعان تامىز كونفەرەنسياسى بارىسىندا استانا قالالىق بىلىم باسقارماسىنىڭ جەتەكشىسى ەلميرا سۋحانبەرديەۆا ءمالىم ەتتى.
«ءسوزسىز، ۇستازدىڭ تىلەگى - الدىمىزعا كەلگەن ءار بالاعا تەرەڭ ءبىلىم بەرۋ، ونى ۇلكەن ومىرگە بىلىممەن قارۋلاندىرىپ جىبەرۋ. ءبىراق، بۇل تىلەك ورىندالۋ ءۇشىن ماقساتتىڭ ىرگەتاسى مىقتى بولۋ كەرەك. بۇل ىرگەتاستى مەكتەپكە دەيىنگى ءبىلىم قالايدى. قازىرگى ساتتە، مەكتەپكە دەيىنگى ءبىلىم - ورتا بىلىمنىڭ العاشقى ساتىسى بولىپ قالىپتاستى، - دەگەن قالالىق ءبىلىم باسقارماسىنىڭ باسشىسى استانا قالاسىنداعى مەكتەپ الدى ءبىلىم بەرۋ ماسەلەسىنىڭ جاي- كۇيىنە توقتالدى.
«ءبىزدىڭ قالامىزداعى مەكتەپ الدى ءبىلىم ورىندارىنا باراتىن بالالاردىڭ سانى جىل سايىن ارتىپ وتىرادى. سەبەبى، قالاعا قونىس اۋداراتىن ازاماتتاردىڭ سانى كوپ جانە ەلورداداعى بالا تۋۋ كورسەتكىشى جاقسارعان. استانا قالاسىنىڭ ءبىلىم باسقارماسى مەكتەپكە دەيىنگى ءبىلىم بەرۋدىڭ الەۋمەتتىك قاجەتتىلىگىنە مونيتورينگ جۇرگىزىپ وتىرادى. بۇگىنگى تاڭدا قالامىز بويىنشا مەكتەپ الدى ءبىلىم بەرۋ ۇيىمدارىنا بارۋ ءۇشىن 83552 بالا كەزەكتە تۇر. ءبىزدىڭ قالامىزدىڭ ءبىلىم بەرۋدەگى ساياساتى - بالالاردىڭ بارلىعىن بالاباقشامەن قامتۋ. الايدا، جاسىراتىنى جوق، بۇل ماسەلە ءالى دە وزەكتى كۇيىندە قالىپ وتىر»، - دەدى ول.
اۆتور: كەنجەكەي توقتامۇرات قىزى