استانادا 82 شەتەلدىك تاكسي قىزمەتىمەن زاڭسىز اينالىسقان
بۇل تۋرالى نۇر-سۇلتان قالالىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«ەلوردادا تاكسيمەن جولاۋشىلاردى زاڭسىز تاسىمالداۋمەن نەگىزىنەن شەتەل ازاماتتارى اينالىسادى. «قاۋىپسىز جول» جەدەل- الدىن الۋ ءىس- شاراسى اياسىندا 19-شىلدەدەن بەرى ەلوردادا 32 زاڭسىز تاكسي ۇستالدى. جىل باسىنان بەرى ءتيىستى تىركەۋسىز كاسىپكەرلىكپەن نەمەسە وزگە قىزمەتپەن اينالىسقانى، ءىس- شارالاردى جۇزەگە اسىرعانى ءۇشىن 125 اكىمشىلىك ءىس قوزعالدى. ونىڭ ىشىندە 82 ءىس جاقىن شەتەلدەن كەلگەن زاڭسىز تاسىمالداۋشىلارعا قاتىستى. سونداي-اق پاترۋلدەۋ بارىسىندا پوليتسيا قىزمەتكەرلەرى شەتەلدىك ازاماتتار باسقارعان ەكى زاڭسىز تاكسيدى ۇستادى. ولاردىڭ ەكەۋى دە وزبەكستان رەسپۋبليكاسىنىڭ ازاماتتارى. زاڭسىز تاكسي قىزمەتىمەن اينالىسقان شەتەلدىكتەرگە قاتىستى اكىمشىلىك كودەكستىڭ 463-بابى بويىنشا حاتتاما تولتىرىلىپ، كولىكتەرى ايىپ تۇراعىنا قويىلدى»، - دەپ ءمالىم ەتتى قۇزىرلى ورگاننىڭ باسپا ءسوز قىزمەتىنەن. ەسكە سالساق، بۇعان دەيىن باس شاھاردا 26 زاڭسىز تاكسيست ۇستالعانىن حابارلاعان ەدىك.
