ەلىمىزدە 82,7 مىڭ زەينەتكەر ءالى دە جۇمىس ىستەپ ءجۇر
Ranking.kz پورتالىنىڭ مالىمەتىنشە، 2022-جىلدىڭ ءۇشىنشى توقسانىنىڭ قورىتىندىسى بويىنشا ءالى جۇمىس ىستەپ جۇرگەن زەينەتكەرلەردىڭ سانى 82,7 مىڭ ادامدى قۇرادى. بۇل جاس ساناتىنداعى قىزمەتكەرلەر سانى بىردەن وسكەن ۋاقىت 2020-جىل بولدى. ول كەزدە جۇمىس ىستەيتىن زەينەتكەرلەر سانى بىردەن 21,7 مىڭعا - 65,3 مىڭنان 87 مىڭ ادامعا جەتكەن. 2021-2022-جىلدارى كورسەتكىش ازداپ تومەندەگەن.
دەگەنمەن، بۇل كورسەتكىشتەر تومەندەتىلىپ كورسەتىلگەن بولۋى دا مۇمكىن. ق ر س ج ر ا ۇلتتىق ستاتيستيكا بيۋروسىنىڭ وڭىرلەر بويىنشا مالىمەتتەرىن ەگجەي-تەگجەيلى قاراستىرعان كەزدە، رەسمي تۇردە، ب ق و، تۇركىستان وبلىسى، استانا جانە شىمكەنت قالالارىندا 65 جاستان اسقان جۇمىس ىستەيتىن زەينەتكەرلەر جوق ەكەنى بەلگىلى بولدى.
2022-جىلدىڭ ءۇشىنشى توقسانىنىڭ قورىتىندىسى بويىنشا، 65 جاستان اسقان جۇمىس ىستەيتىن زەينەتكەرلەر سانى ءار وڭىردە ءار قيلى. نەگىزگى ءۇردىس: وسى ساناتتاعى قازاقستاندىقتاردىڭ كوپشىلىگى سولتۇستىك جانە ورتالىق وڭىرلەردە تۇرادى. رەسمي ەسكەرىلگەندەردىڭ جارتىسىنا جۋىعى (49 پايىزى) قوستاناي (20,9 مىڭ ادام) جانە اقمولا (20 مىڭ ادام) وبلىستارىندا. سونداي-اق قاراعاندى (9,4 مىڭ ادام)، پاۆلودار (10,4 مىڭ ادام) جانە سولتۇستىك قازاقستان (10,8 مىڭ ادام) وبلىستارىندا دا بارشىلىق. قالعان وڭىرلەردە كورسەتكىشتەر ايتارلىقتاي تومەن. ال ەڭ از قىزىلوردا جانە ماڭعىستاۋ وبلىستارىندا كورسەتكىش سايكەسىنشە نەبارى - 115 جانە 244 ادام.
وسى جاس ساناتىنداعى بارلىق جۇمىس ىستەيتىن زەينەتكەرلەردىڭ 75 پايىزدان استامى اۋىل، ورمان جانە بالىق شارۋاشىلىعىندا (62,4 مىڭ ادام) جۇمىس ىستەيدى. ەكونوميكالىق قىزمەتتىڭ بارلىق باسقا تۇرلەرىنىڭ كورسەتكىشتەرى ولارمەن سالىستىرعاندا از. 4 پايىزى قويمالاردا نەمەسە جۇرگىزۋشى (3,6 مىڭنان استام ازامات) بولىپ جۇمىس ىستەسە، 3 مىڭ ادام دارىگەر مەن باسقا دا مەديتسينا قىزمەتكەرى بولىپ ءجۇر. 2019-جىلعى «كوروناداعدارىس» الدىنداعى ۋاقىتپەن سالىستىرعاندا زەينەتكە شىققان دارىگەرلەردىڭ سانى 57,9 پايىزعا ءوستى. قۇرىلىس (2,2 مىڭ) جانە ونەركاسىپ (2,3 مىڭ) سياقتى قيىن سالالاردا 65 جاستان كەيىن دە جۇمىس ىستەپ جاتقان ازاماتتار كوپ.
