نەمەرەسى ساياحاتشى 81 جاستاعى اجەسىنىڭ قانداي تاماقتى ۇناتىپ جەيتىنىن ايتىپ بەردى
جاسىراتىن نەسى بار، ۇرپاعىنىڭ قامىن ويلاعان قازاقتىڭ قاريالارى بۇل جاستا بالا-شاعاسىنىڭ تىلەۋىن تىلەپ، نەمەرە-شوبەرەسىن باعىپ وتىرادى. ءتىپتى، كوبى الەمنىڭ ەڭ كەرەمەت ەلدەرىنە ەمەس، «انا جاققا» ساپارلاپ كەتەمىز بە دەپ قورقىپ وتىرادى.
وقىرماندارعا قىزىق بولادى دەگەن ويمەن، قازاق اۋديتورياسىنا قاتتى ۇنايتىن جانە سوڭعى ءتورت جىل ىشىندە انگليا، فرانسيا، يسپانيا، تايلاند پەن ا ق ش- تى ارالاعان لەنا توقسانبايەۆانىڭ نەمەرەسى ايدىن توقسانبايەۆامەن اڭگىمەلەسكەن ەدىك. ايتپاقشى، بيىل ساياحاتشى اجەنىڭ نەمەرەلەرى مەن بالالارى لەنا اپانى قاسيەتتى مەككەگە ەرتىپ بارماق ەكەن...
- ايدىن، بىلۋىمىزشە، اجەڭىزبەن بىرگە سوڭعى رەت ا ق ش- تى ارالاپ كەلدىڭىزدەر. جالپى، نيۋ-يورك قالاسىنا باراردا اجەڭىزبەن اقىلداستىڭىز با؟
- ءبىز بۇعان دەيىن دە امەريكاعا بارعانبىز. ال، قازىر نيۋ-يوركتە مەنىڭ ۇلكەن اپكەم ءبىلىم الىپ جاتىر. ارينە، قايدا ساپارلاساق تا، ءبىز الدىمەن اجەمىزبەن اقىلداسامىز. ەگەر اجەم قالاماسا، وندا ءبىز دە ەشقايدا بارمايمىز.
- لەنا اپانىڭ دەنساۋلىعى الىس ساپارلاردى اۋىرسىنىپ جۇرگەن جوق پا؟
- جوق، العاش رەت اپام لوندونعا باردى، سوڭعى رەت نيۋ-يوركتى ارالادى. وسىنداي الىس ساپارلاردا قۇدايعا شۇكىر، اجەم شارشامادى. ءتىپتى، دارىگەرلەر «اجەڭىزدىڭ جۇرەك سوعىسى ون سەگىزدەگى قىزدىڭ جۇرەگىندەي» دەگەن ەدى.
- ءسىز اجەڭىزدىڭ سۋرەتتەرى مەن بەينەروليكتەرىن الەۋمەتتىك جەلىگە كوپ جۇكتەيسىز. سۋرەتتەرگە قاراساق، اجەڭىز ومىرگە قۇشتار جان ەكەنىن بايقايمىز. جالپى، لەنا اجەيدىڭ مىنەزى تۋرالى، جاڭاشىلدىقتارعا دەگەن كوزقاراسى تۋرالى ايتىپ بەرىڭىزشى؟
- اجەم راسىمەن دە ءومىردى سۇيەتىن، مىنەزى كەرەمەت ادام. اجەم ءبىزدىڭ ۇسىنىستارىمىزدى قولداپ وتىرادى، سولاي بولا تۇرا، اقىلشىمىز رەتىندە شەكتەن شىعۋعا جول بەرمەيدى. ول مەنىڭ تۋعان اجەم، ال، اجەسىن كىم جامان دەسىن... بالا-شاعاسىنا كەلگەندە وتە جۇمساق، ءبىراق، بەيتانىس ادامدارمەن بىردەن سويلەسىپ كەتۋى ەكىتالاي.
- لەنا اجەگە بارعان ەلدەردىڭ تاماعى ۇناي ما؟
- ساياحاتتاپ بارعان جەرىمىزدىڭ تاماعىنا كەلگەندە، ماسەلە تۋىنداي باستايدى. مىسالى، انگلياعا باراردا اجەم قازى سالىپ العان ەدى. ال، يسپانيا مەن فرانسياعا قازى الىپ شىعا المادىق، ولاردا تىيىم سالىنعان ەكەن. ءبىراق، امالىن تاۋىپ، قازى سالىپ الماعانىما قاتتى وكىندىم، ويتكەنى، اجەم وسى ەكى ەلدىڭ تاماعىن ءسۇيسىنىپ جەي قويمادى.
كوبىنە نان مەن ماكارون جەگەن اجەم «قازى-قارتا سالىپ العاندا عوي...» دەپ، «وكپەسىن» ايتا بەردى. تايلاندقا كەلگەندە، اجەم بالىق جەدى. ال، ا ق ش- تا نەمەرەسى وقىپ جاتقان سوڭ، اس-سۋىن سول ازىرلەپ بەردى. ءبىر قىزىعى، اجەم فاس- فۋدتى، سونىڭ ىشىندە، «KFC» جەگەندى ۇناتادى. ءتىپتى، الماتىدا اندا-ساندا بارىپ تۇرامىز.
- لەنا اجەنىڭ التى بالاسى، 17 نەمەرەسى، 12 شوبەرەسى بار ەكەن. ساياحاتتاعان كەزدە، «مەن بارامىن» دەگەن تالاس بولماي ما؟
- اجەم مەنىڭ اكەمنىڭ قولىندا تۇرادى. سوندىقتان، قايدا بارسا دا ءبىزدىڭ وتباسىمەن بىرگە جۇرەدى. ەسەسىنە، ءبىز دە شەت ەلگە ساياحاتتايتىن بولساق، «اجەم بارا ما، جوق پا؟» دەمەيمىز، سەبەبى، اجەم بارماسا، ءبىز دە ەشقايدا بارمايمىز دەگەن ءسوز. كوبىنە، اكەم جۇمىستان بوساي المايدى، سوندىقتان، انام، مەن، اجەم، ياعني، «قىزدار» قىدىرامىز.
- ال، قاسيەتتى مەككە قالاسىنا قاشان باراسىزدار؟
- اللا جولىن بەرسە، بيىل بارىپ قالامىز دەگەن جوسپار بار. اللا ءساتىن سالسىن دەيمىز.
- سۇحباتىڭىزعا راقمەت! لەنا اجەڭىزگە اللا الەمدى ارالايتىن كۇش-قۋات بەرسىن!
اۆتور: كەنجەكەي توقتامۇرات قىزى
