قاراعاندى وبلىسىندا جاسى 80 گە تاياعان باپكەر بالالاردى جاتتىقتىرىپ ءجۇر
جاس كەزىندە تالاي شىڭدى باعىندىرعان ول ەندى شاكىرتتەرىن جەتىستىككە جەتەلەمەك. سەكسەنگە تاياسا دا سپورتتى سەرىك ەتكەن ەسىركەپ جاقسىبايەۆ مەكتەپ وقۋشىلارىنا بوكستان شەبەرلىك ساعاتىن وتكىزىپ ءجۇر.
جاسى 80 گە جاقىنداعان ەسىركەپ جاقسىبايەۆ كۇندەلىكتى 2 ساعات ۋاقىتىن سپورتقا ارنايدى. بۇل بالا كەزىنەن قالىپتاسقان ادەتى. ونىڭ «ق ر ەڭبەك سىڭىرگەن جاتتىقتىرۋشىسى» دەگەن سپورت دارەجەسى بار. بۇگىندە ءوزى تۇرىپ جاتقان شاحان كەنتىندەگى مەكتەپ وقۋشىلارىنا دا بىلگەنىن ۇيرەتىپ وتىرادى.
«ونى شاحان كەتىندە ءبارى بىلەدى. ءتىپتى سەرىك ساپييەۆتى دە جاتتىقتىرعان. ءبىر ەرەكشەلىگى، بوكستا نامىس بولۋ كەرەك. مىقتى، ءوز تالپىنىسى بار ادام بولۋ كەرەك. وسىنىڭ ءبارىن بىزگە ەسىركەپ اتامىز ۇيرەتتى»، - دەيدى وقۋشى باقىت اسان.
ەسىركەپ جاقسىبايەۆ - بۇرىنعى قاراعاندى دەنە شىنىقتىرۋ تەحنيكۋمىنىڭ تۇلەگى. ول ودان سوڭ سپورت شەبەرى اتانعان، قازاق كسر بىرىنشىلىگىنىڭ جۇلدەگەرى، رەسپۋبليكالىق جارىستاردىڭ جەڭىمپازى بولدى. جاس شاعىندا ەۋروپا ەلدەرىنىڭ رينگتەرىندە جاسىنداي جارقىلداعان.
«شاكىرتىم كوپ بولدى. ەكەۋى الەمدىك تۋرنيرلەردەن جەڭىسكە جەتتى. سولارمەن ماقتانامىن. مەن ءوزىم قارتتىق دەگەندى بىلمەيمىن، بار ءومىرىمدى سپورت سالاسىنا ارنادىم. قازىر دە وسى سپورتتىڭ ارقاسىندا اۋرۋ- سىرقاۋدى بىلمەيمىن. ادام كوپ ءجۇرۋ، كوپ جۇگىرۋى كەرەك»، - دەيدى ق ر ەڭبەك سىڭىرگەن جاتتىقتىرۋشىسى ەسىركەپ جاقسىبايەۆ.
بىلعارى قولعاپ شەبەرىنىڭ اقىندىعى دا ءبىر توبە. سپورت زالىنان شىققان سوڭ مىنا قالىڭ داپتەرىن قولىنا الادى. تۋعان جەرگە دەگەن ماحابباتىن، ماماندىعىنا دەگەن ادالدىعىن قاريا ورىس تىلىندە ولەڭ ەتىپ جازادى. بۇدان بولەك، تاعدىرلاستارىن دا سپورتپەن، بيمەن اينالىسۋعا ۇگىتتەيدى.
«ءبيدى وتە قاتتى جاقسى كورەدى. ءبيدى، سوسىن ولەڭ شىعارعاندى ۇناتادى. كۇندە تاڭەرتەڭ بۇل كىسى وسى مەكمەدەن باستاپ شاحتينسككە دەيىن جۇگىرىپ بارىپ كەلەدى. ەسىركەپ قاماي ۇلىنىڭ تۋعان ءىنىسى بار، ول كىسى ءجيى كەلىپ تۇرادى»، - دەيدى «شاحتينسك قالاسىنىڭ ارناۋلى الەۋمەتتىك كىزمەت كورسەتۋ ورتالىعى» ك م م ديرەكتورى ەرلان جاۋكىموۆ.
قازىنالى قارت 2011 -جىلدان بەرى قارتتار ۇيىندە تۇرادى. ءبىر ۇلى قازا تاپقان، ال قىزى شەتەلدە تۇرادى. قازىر وسىندا وزىمەن تاعدىرلاس 90 ادام تۇرادى.