ورالدا 80 گە جۋىق بالا ات سپورتىمەن اينالىسىپ ءجۇر

ورال. قازاقپارات - ورال قالاسىندا 80 گە جۋىق بالا ات سپورتىمەن اينالىسىپ ءجۇر. بۇل تۋرالى «باتىس قازاقستان وبلىسىنداعى ات سپورتىنىڭ دامۋى: ماسەلەلەرى مەن شەشىمدەرى» دەگەن تاقىرىپتا وتكەن دوڭگەلەك ۇستەل وتىرىسىندا ايتىلدى، دەپ حابارلايدى قازاقپارات ءتىلشىسى.
None
None

باتىس قازاقستان وبلىستىق «بايگە» فەدەراتسياسى ۇيىمداستىرعان جيىنعا اۋدان اكىمدەرىنىڭ ورىنباسارلارى، قالالىق، اۋداندىق سپورت بولىمدەرى جانە كلۋبتارىنىڭ باسشىلارى، فەدەراتسيانىڭ ءار اۋدانداعى وكىلدەرى قاتىستى. وتىرىستى اشقان وبلىستىق بايگە فەدەراتسياسىنىڭ پرەزيدەنتى بەرىك ەسەنعاليەۆ وڭىردەگى ات سپورتىنىڭ دامۋىنا ءمان بەرىپ، اتا- بابامىزدان قالعان ءداستۇردى جاڭعىرتىپ، جالعاستىرۋ ارقىلى جاس ۇرپاقتى وتانسۇيگىشتىككە تاربيەلەۋگە بولاتىنىنا، دەنى ساۋ ۇلتتىڭ قالىپتاسۋىنا ات سپورتىنىڭ پايداسى زور ەكەنىنە توقتالدى. وسى باعىتتاردا بىرلەسە، كەشەندى تۇردە جۇمىس جاساۋعا جانە جەرگىلىكتى بيلىك وكىلدەرىن ات سپورتىن قولداۋعا شاقىردى. جينالعاندار ءىس- شارا بارىسىندا «ورال» سپورت كلۋبى ات سپورتى ءبولىمىنىڭ جۇمىسىمەن تانىستى. ايتا كەتەتىن جايت، اتالمىش ءبولىم اتبەگى، جەكە كاسىپكەر اقىلبەك يشانوۆتىڭ باستاماسى نەگىزىندە، ورال قالاسى اكىمدىگىنىڭ قولداۋىمەن وسىدان ءبىر جىل بۇرىن اشىلعان بولاتىن.

بۇگىندە مۇندا 80 گە جۋىق بالا ات سپورتىنىڭ ءتورت ءتۇرى بويىنشا جاتتىعادى. ءبولىم جۇمىسى تۋرالى قالالىق دەنە شىنىقتىرۋ جانە سپورت ءبولىمىنىڭ باسشىسى ارتۋر شەرعاليەۆ، سپورت كلۋبىنىڭ ديرەكتورى ەسقابىل جالمۋرزييەۆ جانە جاتتىقتىرۋشى اقىلبەك يشانوۆ باياندادى. بۇل ءبولىمنىڭ ەرەكشەلىگى - ات سپورتىنا بالانى 10 جاستان باستاپ ۇيرەتىپ جۇرگەن ەلىمىزدەگى العاشقى مەكتەپتەردىڭ ءبىرى. ءدال وسى تاجىريبەنى ەنگىزگەن ولار ات سپورتى بويىنشا جاسى كىشى بالالارمەن دە جۇمىس جاساۋعا بولاتىنىن تىلگە تيەك ەتتى. الداعى ۋاقىتتا مۇنداي بولىمدەر اۋدانداردا دا اشىلسا، بالالارعا تاجىريبە الماسۋ ءۇشىن مۇمكىندىكتەر تۋاتىنىن ايتتى. كەيىن جينالعاندار جاس پالۋانداردىڭ اۋدارىسپاق جانە كوكپار بويىنشا جارىستارىن تاماشالادى. دوڭگەلەك ۇستەل وتىرىسىنىڭ ەكىنشى ءبولىمى وبلىستىق اۋىل شارۋاشىلىعى باسقارماسىنىڭ ءماجىلىس زالىندا جالعاستى. بۇل جەردە فەدەراتسيانىڭ ءار اۋداندارداعى وكىلدەرى تانىستىرىلىپ، قۇجاتتارى تابىستالدى. كەيىن فەدەراتسيانىڭ اتقارۋشى ديرەكتورى ساتقالي بايزۋللين فەدەراتسيا اتقارعان جۇمىستار مەن كەلەشەك جوسپارلارعا، بايگە ەرەجەسى، بايگەتوبە جانە بايگە الاڭدارىن جاساقتاۋ تالاپتارىن ساقتاۋعا توقتالدى. اسىرەسە، اۋدان اۋىلدارىندا وتەتىن بايگەلەردىڭ ەرەجەگە ساي ءوتۋىن، جارنا ماسەلەسى، بايگە تۇرلەرىندەگى شاقىرىمدار مەن ولاردى وتكىزۋ مەرزىمدەرىن قاداعالاۋ قاجەتتىگىن ايتتى.

مۇنىڭ بارلىعى جۇيرىكتەردى قاۋىپ- قاتەردەن مەيلىنشە ساقتاۋ، ولاردى بىرنەشە رەت بايگەگە قوسۋعا مۇمكىندىك بەرۋ ءۇشىن جاسالاتىنىن جەتكىزدى. الماتىلىق اتبەگى، قولتۋما جىلقىلاردىڭ جاناشىرى، «Qazaq Golden Steed» ج ش س پرەزيدەنتى ەرتىلەۋ ساتىبالدى باتىسقازاقستاندىقتاردىڭ ۇلتتىق ات سپورتىنا جاناشىرلىعى ءۇشىن ريزاشىلىعىن ءبىلدىردى. ول گەوگرافيالىق ورنالاسۋى مەن اۋا رايىنىڭ مەزگىلدىك كليماتىنىڭ ساقتالۋىنا سايكەس وبلىستى بايگە ورتالىعىنا اينالدىرۋعا قولايلى دەپ ەسەپتەيتىنىن، وڭىردە ات سپورتىنا قىزىعاتىن جاس بۋىن قالىپتاسىپ كەلە جاتقانىن ەرەكشە اتاپ ءوتتى. ە. ساتىبالدىنىڭ ويىنشا، كەز كەلگەن سالاعا عىلىم ارالاسپاسا دامىمايدى. وسى ورايدا ءوزى باس بولىپ جۇرگەن قولتۋما جىلقىلاردى قۇجاتتاندىرۋ ماسەلەسى كۇن تارتىبىنەن تۇسپەۋى ءتيىس. سەبەبى تاۋەلسىزدىك العالى ەلىمىزگە كىرگەن قاندى جىلقىلاردىڭ سانىندا ەسەپ جوق. ال ولاردان تۋعان، قازاقستاننىڭ وتاندىق ءونىمى بوپ ەسەپتەلەتىن ارعىماقتاردىڭ ەسەبى، قۇجاتتارى ءالى كۇنگە ءبىر ىزگە تۇسپەگەن.

«سوندىقتان جىلقىنى اسىلداندىرۋعا، ونى تاجىريبەدەن وتكىزۋ جانە ساتۋ ماسەلەسىنە بەي- جاي قاراۋعا بولمايدى. ءبىز تاريحقا ۇڭىلسەك، بابالارىمىز ارعىماقتىڭ اسىلىن مىنگەنىن كورەمىز. مىنە، سولاردىڭ ءىزىن جالعاۋ، قازاقتىڭ اسىل تۇقىمدى جىلقىلارىن الەمگە تانىتۋ ءۇشىن قولتۋمالاردى قولداۋدىڭ ماڭىزى زور»، - دەدى اتبەگى. جيىن سوڭىندا وبلىستىق فەدەراتسيا مەن «Qazaq Golden Steed» ج ش س ءوزارا مەموراندۋمعا قول قويىپ، الداعى ۋاقىتتا بىرلەسىپ جۇمىس جاساۋعا كەلىستى. ەسكە سالا كەتەيىك، بۇدان بۇرىن ورالدا العاش رەت ۇلتتىق سپورت تۇرلەرىنەن اكەلەر مەن بالالار اراسىندا جارىس وتكەنىن جازعان بولاتىنبىز.

سوڭعى جاڭالىقتار