جەتىسايلىق شارۋالار 80 توننا قىرىققاباتتى رەسەيگە جىبەردى

تۇركىستان. قازاقپارات- جەتىساي اۋدانىنداعى ىنتىماق اۋىلدىق وكرۋگىندە ورنالاسقان «كوميلجون» شارۋا قوجالىعى قىرىققاباتتىڭ العاشقى ونىمدەرىن كورشىلەس رەسەي ەلىنە ەكسپورتتادى، دەپ حابارلايدى قازاقپارات ءتىلشىسى.

اقپان ايىندا شارۋا كوميلجون دادايەۆ 12 گەكتار جەرگە قىرىققاباتتىڭ ەرتە پىسەتىن «پەكين»، «ماگنۋس»، «زاريسما» سورتتارىن ەككەن بولاتىن. قازىر القاپتاعى 50 كۇندە پىسەتىن قىرىققاباتتىڭ «پەكين» سورتى ءوز ءونىمىن بەرىپ جاتىر.

«بۇگىنگى تاڭدا 2 گەكتار جەردەن الىنعان ءونىم كولەمى 80 توننا بولدى. شىعىندارىمىز تولىقتاي اقتالدى دەپ ايتا الامىز. قىرىققاباتتى كورشى رەسەي مەملەكەتىنىڭ استاناسى ماسكەۋ قالاسىنا ساتۋعا جىبەرىپ جاتىرمىز»، - دەيدى «كوميلجون» شارۋا قوجالىعىنىڭ ءتوراعاسى كوميلجون دادايەۆ.

جەتىساي اۋدانىندا بيىل 900 گەكتار اۋماققا ەرتە پىسەتىن قىرىققابات ەگىلىپ، بولجام بويىنشا 30 مىڭ توننا ءونىم الۋ جوسپارلانىپ وتىر. ەگىلگەن ءونىمنىڭ باسىم بولىگى - «زاريسما»، «ۆاليكور»، «ماگنۋس»، «كيەۆين فاراو»، «پەكين»، «ريندا»، «زاكاز» سورتتارى.

«وتكەن جىلى اۋدان ديقاندارى 1000 گەكتاردان استام جەرگە قىرىققابات داقىلىن ەگىپ، 31,5 مىڭ توننا ءونىم الدى. نەگىزىنەن ەرتە پىسەتىن قىرىققاباتتىڭ باسىم بولىگى رەسەي، بەلورۋس جانە ەۋروپا ەلدەرىنە ەكسپورتتالادى»، - دەيدى جەتىساي اۋدانى اۋىل شارۋاشىلىعى جانە جەر قاتىناستارى ءبولىمىنىڭ باس مامانى نۇرتاس تۇرسىنبەكوۆ.

اۆتور: قايرات زاينيشيەۆ