اقمولا وبلىسىندا بوراندا جولدا قالعان 80 ادام ەۆاكۋاتسيالاندى
«اۋا رايىنىڭ ناشارلاۋىنا بايلانىستى 29-30 ناۋرىز ارالىعىندا وڭىردە رەسپۋبليكالىق ماڭىزى بار 21 جانە وبلىستىق ماڭىزى بار 35 اۆتوجولدا كولىك قوزعالىسى توقتاتىلدى. الايدا، جولدىڭ جابىلۋى تۋرالى حابارلامانى ەلەمەي جولعا شىققان 80 ادامدى قۇتقارۋشىلار جىلىتۋ ورىندارىنا ەۆاكۋاتسيالادى. ولاردىڭ اراسىندا بالالاردا بار. قۇتقارۋ جۇمىستارى بۇلاندى، شورتاندى، جاقسى، ەسىل، ارشالى، استراحان، سەلينوگراد، قورعالجىن جانە اتباسار اۋداندارىندا جۇرگىزىلدى»، - دەدى اقمولا وبلىستىق ت ج د باسپا ءسوز قىزمەتىنەن.
سونىمەن قاتار، ەكپىندى جەل مەن بوراننان قوسشى قالاسىندا 5 قاباتتى ەكى تۇرعىن ءۇيدىڭ جانە ارشالى كەنتىندە ەكى اكىمشىلىك عيماراتتىڭ شاتىرىنا زالال كەلدى.
قازا بولعاندار مەن زارداپ شەككەندەر جوق.
وسى رەتتە، اقمولا وبلىسىنىڭ ت ج د قىزمەتكەرلەرى ءوڭىر تۇرعىندارىنا اۋا رايىنىڭ جايسىزدىعىن ەسكەرتىپ، ەلدى مەكەندەردەن تىس جەرلەرگە شىقپاۋدى سۇرايدى. جولداردىڭ جابىلۋى تۋرالى اقپاراتتى «دارمەن» قوسىمشاسى ارقىلى نەمەسە 1403 بايلانىس ءنومىرى بويىنشا بىلۋگە بولادى.
