80 گە كەلگەن اقساقال تۋۋ تۋرالى كۋالىگىن ەندى الدى
وزبەكستاننىڭ انديجان وبلىسى حودجااباد اۋدانىنىڭ تۇرعىنى، 80 جاستاعى وبيدجون ابدۋنابيەۆ العاش رەت تۋۋ تۋرالى كۋالىك پەن ءتولقۇجات الىپتى.
بۇل تۋرالى centralasia.media سايتى جاريالادى.
وبيدجون ابدۋنابيەۆ نەگىزى 1940 -جىلى حودجااباد اۋدانىندا دۇنيەگە كەلگەن. ءبىراق وسى ۋاقىتقا دەيىن جەكە تۇلعاسىن راستايتىن قۇجاتتارى بولماعان. سونىڭ كەسىرىنەن قاريانىڭ كوپجىلدىق جۇمىس ءوتىلى ەسەپكە دە ىلىنبەگەن. قازىر اقساقال زەينەتاقى الا الماي وتىر.
ول وسىدان 65 جىل بۇرىن قۇجاتى بولعانىن، ءبىراق ونى جوعالتىپ العانىن تىلگە تيەك ەتتى. ءوز قۇجاتىن قايتا قالپىنا كەلتىرۋگە تىرىسقانىمەن، ناتيجە شىعارالماعان.
تەكسەرىس بارىسىندا وبيدجون ابدۋنابيەۆتىڭ ۇيدە تۋعانىن، اكەسى 1942 -جىلى سوعىسقا اتتانىپ، 1943 -جىلى مايدان الاڭىندا قازا تاپقانىن راستاپ وتىر. سول ءۇشىن وعان تۋۋ تۋرالى كۋالىك دە بەرىلمەي قالعان ەكەن.
