الەمدەگى ەڭ ەگدە ەرلى-زايىپتىنىڭ وتاسقانىنا - 80 جىل
ولار وسىعان دەيىن گيننەسستىڭ رەكوردتار كىتابىنا «الەمدەگى ەڭ كارى ەرلى-زايىپتى» رەتىندە ەنىپ ۇلگەرگەن بولاتىن.
«ءبارى 1934-جىلى زوولوگيا ساباعىنان باستالعان»، - دەدى The Washington Post جۋرنالىنا بەرگەن سۇقباتتا.
ءدارىس وقىلاتىن اۋديتوريادا ستۋدەنتتەر ءالىپبي بويىنشا وتىرعىزىلاتىن. سول كەزدە 21 جاستاعى دجون 20 داعى شارلوتتانىڭ قاسىنا كەلىپ وتىرادى. وعان قىز بالانىڭ تىم ۇياڭ ەكەنى قاتتى ۇنايدى.
العاشقى كەزدەسۋدى شارلوتتا: «ماعان ول بىردەن جاقسى جىگىت سەكىلدى كورىندى. مەن ونىڭ ماعان قايتا-قايتا قاراي بەرگەنىنە قارسى بولمادىم»، - دەپ ەسكە الدى.
دجون 1913-جىلى تەحاس شتاتىنداعى فورت-ۋەرت قالاسىندا دۇنيەگە كەلگەن. 1930-جىلى ول تەحاس ۋنيۆەرسيتەتىنە وقۋعا ءتۇسىپ، وستينگە اتتانادى. سول جەردە ول جەرگىلىكتى فۋتبول كومانداسىنىڭ قورعاۋشىسى بولىپ ويناعان.
شارلوتتا 1914-جىلى ايوۆا شتاتىندا دۇنيەگە كەلگەن. ول 20 عا اياق باسقان كەزدە تۋعان اپكەسىنىڭ جولداسى اپاتتان قايتىس بولىپ، ونى قولداۋ ماقساتىندا وتباسى تۇگەل تەحاسقا قونىس اۋدارادى.
كەيىن شارلوتتا تەحاس ۋنيۆەرسيتەتىنە وقۋعا ءتۇسىپ، سول جەردە دجونمەن تانىسادى. عاشىقتار 1939-جىلى، ياعني، وقۋ بىتىرگەن سوڭ بىردەن ۇيلەنەدى. سودان جۇبى جازىلماعان.
ەكەۋىنىڭ ەستۋ قابىلەتى سىر بەرگەنىمەن، وزدەرىن وتە جاقسى سەزىنەدى. جاس كەزدەرىندە قول ۇستاسىپ كوپ ساياحاتتاعان. وڭتۇستىك امەريكا، سكانديناۆيا، ءتىپتى، قىتايدا بولىپ، وزگە دە ەلدەرگە كەمەمەن ساپار شەككەن.
«ءبىز ەشقاشان بالالى بولمادىق. ۇزاق ءومىر ءسۇرۋىمىزدىڭ قۇپياسى وسى بولسا كەرەك»، - دەپ قالجىڭدايدى دجون.
ءومىر بويى ءبىر شاڭىراق استىندا ءومىر ءسۇرۋدىڭ قۇپياسىن سۇراعاندارعا ەرلى-زايىپتى بىلاي دەپ جاۋاپ بەرەدى: «قانداي كيكىلجىڭ بولسا دا، ونى شەشپەي ۇيقىعا جاتپاڭدار. ەرلى-زايىپتىلار ەشقاشان بولەك توسەكتە ۇيىقتاماۋى ءتيىس».
Massaget.kz
